James Vnl: 2020 election cu khuaruahhar in muilakah aa thupmi kan chunglei nunning vialte ceunak ah kan hun lang viar. Hihi Bawipa tuahmi thil asi. Tuu le meheh kan ihngal cuahmah! Democratic Party nih tuuphaw an ihrukmi alang, Republican Party pawl hmunkhat ah rian an ṭuan khawhlo le an iṭhencheu alang.
Big Tech pawl power an ngeihzia le Mainstream medias an corrupt ning le Democratic Party branch an si alang. U.S ram hi Pathian duhlomi sualnak in a khattuk cang i Bible biatak an hlawt cang ti alang. Kan Chinmi politicians pawl le mifim pawl zong negative mindset lawngte kan ngeihnak alang. Hihi ralkap uknak lungput kha kan tei rih lo caah asi men lai.
Cucaah cun pei Chinmi phun hmunkhat ah kan ifuntom khawhlonak asi tawn. Cun kanmah Chin Khrihfami Jesuh Khrih kan zumhnak le Bible kan inunpi le nunpi lo alang. Biakinn/bu le phungphai kan ṭanh nain Jesuh Khrih kan dawt lo le a bia kan inunpi duhlonak alang.
Abikin Bible cawnpiaktu pastors le Bible degree angeimi hna zong Khrih salṭha kan si lo zia, Khrih caah zumhawktlakmi kan si lo zia le Pathian duhning in siloin minung duhning in kan nunzia kan ṭial alang. Cun tili chungah mipa a tlak lio i va chanhngam loin lungkua chungah aa thupmi le ralchiami zong kan rak tampi ve.
Cucu Thiang Thlarau rianṭuannak kan cungah a um hrim lo caah asi. Laimi hi thlacam ngaingai kan hau. Bible rel/cawn ngaingai kan hau. Duhthimnak hi a sunglawitukmi laksawng Bawipa nih a kan pekmi asi. Thilṭha he thilchia he kanmah le duhmi paoh ithimnak nawl kan ngei. Pathian nih hraamhraam in zeihmanh a kan hne lo.
A fapa Jesuh Khrih hmanh duhthimnak a kan pek. Zungzal thihnak le zungzal nunnak zong duhthimnak a kan pek. Vawlei ah minung nih kan ngeihmi asangbikmi cu duhthimnak kan ngeihmi hi asi. Asinain kan duhthimnak hi Bawipa nawlngeihnak (sovereignty) tangah a ummi asi. Duhthimnak in adonglo kan duhthimnak cungah Bawipa biaceihnak kan ihuah ve.
Duhthimnak caan aphak tikah minung hi zeibantuk dah kan rak si timi kan chunglei taktak sining alang. Kan duhnak le kan ṭanhmi cungah hin alang khun. Kan duhnak le kan ṭanhmi cungah nunnak pek angamhmi minung kan si. Vawleimi nihcun vawlei duhnak ahkhan thih an ngamh i Thiang Thlarau ngeimi nihcun Khrih thawngṭha bia caah thih ngamh ve.
