Thailand ram ngandamnak zung in biathli a chuakmi ca chuakmi ah Tuluk ser Sinovac covid raikhamsi chunhcia dih cangmi ngandamnak lei riantuan pawl vialte hna cu a thar in Pfizer raikhamsi tu chunh dih than ding tiah i timhlamhnak an ngei tiah an chim.
Hi ti atu bantukin Pfizer i chun nolh ding tiah ruahnak a chuahtu hna lakah hin Thailand ngandamnak lei he pehtlai in sii lei mithiamsang pawl zong an i tel. Atu bantukin Thailand sii lei mithiamsang pawl hna nih ruahnak an chuah tharmi thawngpang ruangah Sinovac covid raikhamsi zeitluk khan dah a riantuanning asi timi kongah Thailand mizapi cu lunghring ngai in an um cang ko hna.
A luancia caan ahkhan Thailand acozah nih ngandamnak zung riantuan pawl vialte hna kha Tuluk ser Sinovac timi covid-19 raikhamsi cu a rak chunh dih an si.
Hi biathli a chuakmi ca hi Thailand ram acozah ngandamnak zung riantuan rinhchanh ngaimi Opas Karnkawinpong nih cun a deu a si tiah solhphelhnak bia a chim ko nain Thailand Ngandamnak zung lutlai Anutin Charnvirakul belte tu nih khan cun hi ca hi a deu asilo atak a dikhmaanmi ca a si ko tiah chim.
Tuluk nih hi covid raikhamsi a serchuahmi kong he pehtlai in hin zeitluk in dah mi a venhimning timi he pehpar in zeihmanh bialehnak le fianhnak a tuah lem rih lo.
