Mino pawl hna zong nih covid-19 hi fak ngai le zualhma ngai in an tuar khawhmi a si tiah Spain ram ngandamnak zung vuanci nih July ni 7 ahkhan ralrin peknak bia a chim. Raikhamsi chunh rih lomi minobu lakah aa thlengnawng tharmi pungsan dang covid zawtnak an kai tikah zarhkhat chung bak ah zawtnak a lethnih in a karh caah mino pawl i ralrin taktak dingin vuanci nih a nawl hnanak cu a si.
Kum 12 in 19 kar mino lakah siseh, cun kum 20 in 29 karlak mino sinah zawtnak hi a karhning a hung rang hlei tuk timi kha kan hmuh tiah vuanci nih press release-nak ah a chim.
Tulio caan zawtnak a ngei tharmi a tam u hna hi cu sianginn a dih cang dingmi sianghngakchia pawl party-puai zawhnak he aa pehtlai tiah zong a chim chap. Zawtnak venhimnak caah Spain, nichuah-chak lei Catalonia hmunram cu July ni 9 thawk in Night Club pawl zong khar an si cang lai.
Germany le France ram Europe ram pawl ah cun kum tling cangmi pawl vialte cu raikhamsi chunh an thawk cang ko nain, Spain ram belte tu cu kum upa tar pawl raikhamsi chunh ding an timhlamhpiak cuahmah lio hna lawng a si ve rih. Kum 40 cunglei zatuak 89 percent hi raikhamsi avoi khatnak chunh a lim cang i, kum 20 in 29 karlak mino zatuak 14 percent lawng chunh an lim rih hna tiah Reuters nih a langhter.
