“Aw LALPA, zingah chuan ka aw hi i lo hre thin ang a; Zingah chuan ka tawngtaina hi i hmaan ka rel fel diam ang a, ka lo ngaihven thin ang.”
Sawi fiahna: Ni tin, nasa takin kan tawngtai thina mahse, Pathian chhanna chu, “Aih” tih te pawh a ni fo mai. Hetianga “Aih” tia chhan a nih hian ringtu chu a beidawng fo thin a, Pathian hi a awm lo a ni ang, min ngaihsak lo a ni ang tiin a vui fo thina ni. Mahse, Pathian min chhanna chu eng ang pawh ni se la, kan beidawng mai tur a ni lo. Kan thatna tur a ngaihtuah reng a ni tih hriat tur a ni.
KAN RIN ANG LO TAKA KAN TAWNGTAI A CHHAN HUN A AWM FO: Pathian chuan kan rin loh ang takin min chhang thin, A chang chuan Pathian chhanna chu, kan rin dan nena dang daihin a awm fo thin. Pathian ngaihtuahna leh kan ngaihtuahnate hi a dang daih tih hriat fo tur a ni
Pathian hnenah chakna leh thlamuanna kan dil a, mahse, kan dil loh zawk a lo thleng fo thin Mahse, Pathian chuan thil tum a lo nei thin a ni, Rom 5:3-4 “ Tin, chuti chauh chu ni lovin, kan
hrehawmnaah pawh lawmin i awm ang u, hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam tih kan hre si a”
1. Zingah darkar hnih tal ka tawngtai loh hi chuan sual hian ni lengin min awmchilh thin. (Martin Luther)
2. Van ram panna kawngpui, National Highway chu Bible hi a ni. (Mrs. Charles E.Cowman)
3. Mihringa kan innghah pawhin mihring tih theih ang kan hmu thin. Tawngtainaa kan innghah erawh chuan Pathian tih theih ang kan hmu a ni. (A.C. Dixon)
4. Tawngtaina hi Pathian hnena kan luh teihna kawngkhar a ni a, rinna hi a kawngkhar hawnna (Chabi) a ni. (George Muller)
5. Rinna dik tak nena tawngtai chu chhan loh a awm ngai lova, chhan lohin a awm bawk hek lo vang. (Mc. Cheyer)
6. Hnehna chu tawngtaina hmangin a ni. Tawngtaina chelh tlattu chuan, Hmelma a tawlh kirtir thin. (Unknown Christian)
7. Ka tawngtaina chu zingah thal angin ka kap chhuak thin ang a, Pathian hnen a thlen leh thlen lo hen nan ni lengin ka ngaihtuah ang. (Dr. Charles Stanford)
8. Ralthuam phur thlawhna aiin tawngtaina ralthuam a roui zawk a ni. (Unknown Chritian)
9. Thiltihtheihna kan hman ngai loh ber chu tawngtaina hi a ni. (Mr. Babson)
10. Hun nuam nei tur leh hahdam turin tawngtai suh. Chakna dilin, i chaknain a phak chin ni lovin, i chaknain a phak loh atan dil ang che. (Phillip Brooks)
KAN NUNPUI TUR:
1. Kan tawngtaina kan duh anga chhan a nih loh mai avangin Pathian hian min kalsan a ni lo. Kan tan thil tum leh tih tur ropui tak a nei vang zawk a ni.
2. Kan tawngtaina te hi a vaiin Pathian hian min chhang ta mai se, kan buai hle lo vang maw? Chuvangin, kan tana tha turin kan dilnate chu “Aih, Nghak rih rawh, aw le” titein min lo chhang thin a lo ni.
3. Pathian hian kan tawngtainate hi kan duhdan ni lovin, Ama duhdanin min chhang thin tih kan hriat chian a hun ta.
4. I tawngtainate chhan vek a nih loh avangin lawmthu sawi la, beidawng lovin nghak hram hram thin ang che. Credit: George Tluanga
