Hringtu NulePa nih fale cu kan Dawt tuk cio hna. An zawn kan ruah tuk hna i heh tiah ka fa dawt le caah tiin rian zong kan i hne i, rian kan țuan. Kan si khawh chungin zohkhenh kan i zuam hna. Ka fa Dawtle hi hawi a hngar sual lai kanti hna i, kanmah cang cun kan si khawh tawkin a zeilei poah ah nucan kan cuh i, pacan kan cuh.
Fale caah cun ing tuar kho usih kanti i a herh ah a herh ningin zan mitkuh cim lo le rawl zong kim huaha loin a chel caan ahcun kan um piak hna. Cu tluk in kan Dawtmi hna kan fale cu an upat tikah mițha si hna seh. Mi hmaiah Zohchunh awktlak tein nung hna seh law, Hringtu Nulepa lunglawmh tertu si hna seh ti kan duh dih cio hna i aphunphun in an lungton kan i zuam hna i kan Dawt hna.
Fale caah pei kan nun cu kanti i a chel caan ahcun kan rian țuan re zong a thei ko nain, kan thabat kan thei lo caan zong aum tawn. Cutluk cun kan Dawt cio hna. Cu tluk in kan Dawtmi hna kan thisa in hrinmi kan fa dawtle hmailei an nunnak an khuasaknak ding hi tlawmpal tein van ruat ți țhan hna usih ti kan sawm hna.
Pathian nih, kan miphun laimi vialte a kan dawt i ram kenkip lo ah khua kansa hna i vawlei cung miphun kip cawhin kan nung cang hna. Ramdang ah aum mi cu chimlo, lai lei, lairam, laitlang ah khua asa mi hna zong miphun dang nih an in um hnawh tuk cang hna i, miphun dang, biaknak dang, ruahning le nun phung kalh in cawh hrup in khua kansa cang hna.
Hi lio caan ah hin, Hringtu nulepa nih, kan Dawt tukmi hna kan fale hi, zei bantuk miphun le zei bantuk Biaknak angei mi nu maw a țhit te lai, pa maw a vat te lai timi hi ruah lo awk kan țha hna lo. Mah duh bikmi cu, mah miphun le mah holh le mah biaknak ai khatmi te Khrihfa Dawtnak in ațangmi Zumtu he i țhi um kho hna sehlaw, tihi kan duh dih cio ko hna lai.
Sihmanhsehlaw, hringtu nulepa duh ningin anung micu kut tong khiah lawnglawng in a nung mi ansi tawn bantuk in, Hringtu nulepa lei kam in zeitluk in dah i ralrin le a Nungmi kan Pathian sawm kan herh timi hi ruat cikcek hna usih law….Kan Biaknak le Kan zumhnak ah hin fek chin Chin in kan Dawtmi hna kan fale hi Hruai chin ko hna usih ti mi te hi Dawtnak le Siaherhnak le zawnruahnak he ka van țial duh tukmi te cu asi.
Kannih nupa zong Pathian Thluachuah Fapa rosung Pa pahnih kan ngei ve i, an hngakchia rih, kum6 le kum4 lawng ansi rih. Atu Pathian nih khua a kan sak ternak hmuh cu, US ah asi ve i, miphun kan tamtuk, Biaknak an tam tuk, zumtu, zumlotu i cawh țhupin singinn kai ca cawn asi tikah keicu ka ruat ngaingai ko. Kanpa cu arian ah abuai i kan fale zong an no te rih i aruah zong aruat rih lai lo tiah karuah. Kanpa bantuk in a ruat rih lomi kan tampi ko hnalai.
Atu lio kan fale an no lio te hin ruah aphu hringhran ko. Hringtu NulePa nih biatak tein Khrih JESUH Chung i an nun khawhnak hngale Khrihfa an zumhnak hi afeh taktak khawh nak hnga kan Dawtmi hna kan fale tete hi kan si khawh chungin le Bawipa nih caan a kan hlanhmi chungah Biatak tein zing chun zan in A Nungmi Kan Pathian kong hi kan chimh cawnpiak hna i cuti cun an lungthin an Nun a țhan khawhnak hnga. Hringtu nulape hi kan Dawtmi hna kan fale caah JESUH KHRIH kan zumhnak ah hin Thlalang Țha taktak mi si kan herh hringhran ko.
Mi zei bantuk Miphun le Biaknak he vai i tong sual hna hmanh sehlaw, Kan Dawtmi hna kan fale nih, an Nupi le an Vale kha Khrih JESUH Chungah Nung dingin an luhpi Khawh nak hna hnga atu te hin Hringtu NulePa nih Kan Dawtmi hna kan fale hi Fek chin in Kan Biaknak le JESUH KHRIH Kan zumhnak hi, inn Chungkhar in biatak tein felfai taktak in dirpi peng hna usih.
Kan Dawtmi hna Kan fale, kan tule, kan te chin fapar tiangin JESUH KHRIH Chungah anungmi si Zungzal dingin Hringtu NulePa nih zing, chun, zan in Pathian Bia Nung a țhawng i minung lungthin duhnak le ruahnak vialte a hngal dihtu a Nung Kan Pathian sinah kalpi peng hna usih law zungzal nunnak an Thlarau cale hi vawlei an nun chung cioah Bawipa Sunparnak an langhter Khawh cionak hna hnga kan Dawtmi hna kan fale caah thlacam țang chin hna usih law, Bawipa a Nungmi kan Pathian sawmpi Zungzal ko hna usih.
