2012 kum ah khan Pi Daw Aung San Su Kyi cu Indiaram khualipi,New Delhi ah india cozah sawmnak in a rak ra i mah lio ahcun,Delhi i a um mi, Chin, Kachin, Kawl hna nih hmuh kan rak timh,mah lio i a rak chim mi cu, kawl pawl lawng ka hmu duh hna a rak ti,sihmanhselaw tawlreltu hna nih, kawlpawl lawng cu tlawmte lawng kan si caah, 80% hi Chin miphun an si i an nih zong nihi an dihlak a si khawhlo hmanh ah khrihfabu lei i hruaitu le Community lei i hruaitu hna kan thimter hna lai i mah ti cun bia chimnak caan kan in tuah piak lai i si kho selaw kan ilawm kohnga tiah nawl chih a si hnuah, aw a tha ko a rak ti.
A tlun a thaizing ah hin india cozah nih an sawm channak,hall hmun ah hin kawl he lai he minung 50 nih a bia chim cu kan vangaih hna i, mah ahcun india le kawlram a pa nun lio in hawitha an sinak kong a chim i a mah tiang zong an dawtnak kong cu tawite in a rak chim i india mi pawl cu an rak ilungsi ngaingai hna. Acaamnak in a nihnihnak ah, Oxford, Vikaspury ahcun BCD le Chin Community pawl hna i kawmh in Oxford siangin hmai ahcun mandat sak a si i, Kawl he lai he minung 600 kan kal i, vai zeimawzat nh an rak zulh ve, mah lio ahcun CWO ti mi a um lio a si i nu pawl nih a tu i ai eih lengmang mi Lai puan a senmi te khi rak eih a si.
Mah lio caan i a bia chim mi tampi lakah ka philh khawhlo mi cu, India ram ah hin kawlram mi a um mi hi 6000 renglo tluk nan si i mah ahcun Chin mi hi 80% tluk nan sinak kong cu nan hautu hna sin in ka theih i, a zei a sihmanh ah Burma mi nan si hna i miphun pakhat,ram pakhat kan si ti ithei in nan chiat nan that ah nan zawn i ruat cio ko hna uh, kei cu ka miphun kawl mi caah thih le thih tiin a tutiang hi rian ka ttuan i ka cawlcaang,ka pasal a thih lio hmanh ah ka um loh,cucu zeidang ruangah a si lo,ka miphun kawl miphun le burma ram ka dawt caah a si,a rak ti.
Achim than mi cu,a tu hi President tin Seing hruainak thawngin kan ram cu Democrecy lamthluan kan zulh cuahmah cang i, mah a kal ning cuanh le zoh tik ah hin kan ram hi kan rak aupi lengmang mi lamthluan hi kan phan kho ko lai ti hi ka zumh, mah kan phanhtik ahcun, ram dang a kal mi zong nih kan ram te ah nan rak tlung cio te hna lai.
Mah cu a tlin khawhnak hnga dingah thlacamnak in nan biakmi sin cio ah ngeih i zuam cio ko uh tiah a rak kan chimh. Mah a chim mi chung in ka thinlung ah a chuak cawlh mi cu, aw kan pi hi kawl miphun le kawlram calawng ah pei a rak cawlcangh ko hi, kan nih Tlangcung mi kan caah cun a rak cawlcaang hrimhrim lo hi teh tiah ti kha thuukpi in a ka ruahtercawlh. Catialtu: Tinduh Thang
