Europe in a rak tlawngmi khualtlawng pawl vialte cu a si khawh chung bik in zawtnak an ngeih le ngeih lo venhim ding tiah India nih ralrinnak a pek hna hnu, thaizing ah India ram Serum Institute in chuahmi AstraZeneca raikhamsi asimi Covishield cu Switzerland, Iceland le EU ram pasarih hna nih pompi cohlannak an ngeih cang.
Australia, Germany, Slovenia, Greece, Iceland, Ireland, Estonia le Spain ram hna nih Covishield raikhamsi (vaccine) aa chunmi paoh cu an ram chung luhnak nawl pek an si lai tiah fehternak an ngei cang tiah acozah thawngpetu hna sinin thawngtheih a si tiah Mizzima nih a tial. India acozah nih a chuahmi sii Covishield le Covaxin vaccine raikhansi pawl cu Estonia zong nih kan pom ve tiah fehternak an tuah.
India zong nih hi ram pawl hna cu luhnak nawl pek an si ko lai tiah an hnatlakpi tiah thawng theih a si. European Medicines Agency hna nih an rak sok cangning bantuk in Serum Institute lei i tuanvo ngeitu company nih thla khat chungah pompi hnatlakpiaknak an ngah lai, pek an si lai tiah ruahchannak kan ngei ko tiah Serum Institute nih an chim.
Covaxin hi Vawleicung Ngandamnak Buu (WHO) nih phungning tein cohlannak a tuahmi le a pekmi a si lo nain European Medicines Agency lei sin khan pompiaknak le fehternak an ngeih hna hnuah, WHO nih a cohlanpiak hna lai ti hi ruahchannak ngeihmi asi.
