Iraq ram thlanglei ummi, Nasiriyah khua sizung pakhat covid mizaw pawl an thlopnak sizung ah Oxygen dur a puak i meikanghnak a chuah ruangah minung 50 lengkai an thi i, minung 67 lengkai nih hliamhma an put tiah Ngandamnak lei riantuantu pawl le palik pawl hna nih July ni 13 ah an chim. Meikaang le meikhu lakah nunchanh himtu pawl nih miruak pawl cu heh tiah an kawl hawl lio hna si.
Hi bantuk thil a can le cangka in hin vuanci nih emergency lakhruak meeting a kawh i, Nasiriyah khua Civil Defense Manager pawl le ngandamnak lei manager riantuantu pawl cu an rian in an dinhter hna hnuah tlaih ding tiah nawl a chuah cang tiah vuancizung in ca an chuah. Cu lawng si rih loin sizung manager zong a rian in an dinhter i, tlaihkhih dingin nawl an chuah fawn cang.
Iraq ram hi ral ruangah sipuazi in hrenphih asi tikah Covid-19 zawtnak lei i venhimnak ah biatak tein harnak an tong ve i, heh tiah an covid zawtnak rai an doh liopi a si ve. Iraq ahhin minung 1.4 million lengkai Covid-19 mizaw an um cang i, hi chungah hin minung 17,600 hrawng nih an thihpi cang. Crd. SCMP, DVB
