Rampi uknak hramhram in a latu uknak ripa Min Aung Hlaing a thi tiah a ruak zawnh taktak phun bantuk timhlamh i duhlonak langhternak video pakhat i tel le mui cuan ve ruangah PyiMyo khuachung nu pathum cu July ni 4 zinglei caan ah khan tlaih an tong tiah khuami hna nih an chim.
July ni 3 kha Min Aung Hlaing chuahni a si i, cu a chuah ni ahcun a ruakkuang i zawn in duhlonak an rak langhternak video file pakhat cu social media ah an thlah than, mah cu an thlah hnu, video chungah aa telmi a mui langmi nu pathum hna cu tlaih an tonnak aruang a si.
PyiMyo khua, Point Hlah Thein Gon sang khuasa kum 37 Daw Thandar Lin cu a inn ah an va luhhnawh i an tlaih i, adang nu pahnih an tlaihmi hna tu hi cu an min le an umnak theih khawh rih an si lo.
Hi video file hi uknak an rak lak dihka hrawng i rak thlakmi video hlun kha a si i, July ni 3 ah Social Media ah a thar in an thlah than tiah Daw Thandar Lin le chungkhar he neihniam minung pakhat nih a chim. Facebook ah a thar in an thlah thanmi video tangah hi video hi rak hlonh than tiah siseh, cu lo ahcun a chung i a langmi pawl harnak an tong kho tiah comment zongah tha tein a thlahtu sinah an nawlnak zong hmuh a si. RFA
