Covid -19 positive an tam chin lengmang caah Yangon zong duhning in mizaw herhmi Oxygen cu hlan bantukin an chuahpiak kho ti hna lo tiah Mizaw zohkhenhtu hna nih an chim. “A um ti lo, kan sinah Oxygen dur zong an um ti lo” tiah mi bawmchantu rianngeitu pakhat nih a chim.
Yangon khuachung ah oxygen lei mi bawmchantu zong chawnhbiak an si tikah an chimmi cu mi bawm dingin harnak a um cang e tiah theih a si. “Oxygen dur an um ti lo. Dur a lawngmi thunpiak ding belte cun nihin ah a ngah lai. Ni dang caah kan chim kho lo. Midang cio zong an ngeih ti hna lo tikah, a dih colh kho” tiah rianngeitu pakhat nih a chim.
A tam deuh cu inn ah mah tein aa thlopmi an si hna. “Tamwe i inn pakhat lawng bak ah Oxygen dur 6 nikhat ah a dih. Kan ngeihmi dur vialte cu inn ah aa thlopbulmi kan pek hna. Atu hi sizung ah rawn than ding tiah le a ngah rih fawn tung lo. Nihin zong hi zei caan ah dah kan rawn lai hngalh a si kho rih lo” tiah buu pakhat chung rian tuanmi nih a chim.
Oxygen a chuahtu sehzung pawl nih caan hmaan tein suimilam 24 chung ah rawnpiak khawh a ngah ko nain mei a mih hna ahcun chun nitlak i tlar in hngah a si tiah a chim. Oxygen dur hi zatuak in Kyat 5000 hrawng kan pek tiah a chim.
Oxygen a pe khotu inn ah hmanmi seh pawl hi bazar dawr ah um kho hmanhseh, aman a fak, cun hi seh pawl hi a taktak tiah cun oxygen a herh taktakmi mizaw zual deuh caah a herhning zat in a chuahpiak kho hna lo tiah sibawi pakhat nih a chim. Ref. DVB
