NUG acozah cu UN Human Rights chief Michelle Bachelet nih cohlannak a tuah hnuah, Myanmar ram sicanning hi nuhrin covo lei pehtlai in rawhralnak lei siseh, cun ramchung ralthawhnak lei panh in a kal i a dirhmun hi chiachin lengmang dirhmun a phan kho ko cang tiah UN Human Rights Council ah a chimphuan.
Myanmar Ralkap nih NUG acozah, Tlancung hriamtlai buu, Mizapi Venghimtu Buu, CDM phu pawl, le adangdang hna he itonnak le ceihhmaitinak ngei dingin Michelle Bachelet nih ruahnak cheuhbauh le forhfialnak a tuah. UN Human Rights Council ah Michelle Bachelet nih chimchinnak a ngeih tikah NUG acozah min a vun pholangh hnu, vawleicung ramkip hna zong kha Myanmar ram mizapi he dirti le dirpiak dingin a nawl fawn hna.
Atu Myanmar ram dirhmun ah ramkhel buaibainak in nuhrin covo rawhralnak lei ah a kal thluahmah cang i, minung 900 renglo thahnawn an ton cang pinah, minung 5200 leng tlaihkhih an tong, ralkap hna nih ngandamnak lei riantuannak inn hna, motor in ngandamnak lei riantuantu cungah hnahnawhnak voi 240 lengkai a pek hna, media riantuantu minung 90 leng an tlaih cang hna pinah, thawngpang chuahtu phu 8 cawlcang kho loin an phih i, an thilri an lakpiak dih hna tiah a chim.
FAO nih a chimning ahcun minung 6 million cu eidin lei taamhalnak an tong ati, UNDP nih a ruahdamhning lebang cun 2022 phak hlan hrimhrim ah Myanmar ramchung um mi hnarcheu lengkai cu tamhalnak lei harnak an tong kho tiah a ti. Cu lawng si loin hriamnam rinhchanh in lehrulhnak zong ralkap nih biatak tein an tuah peng khawh pinah, tlangcungmi pawl cungah tukdohnak le an i thuhnawhnak hmun le biaknak lei inn le lo pawl hriamnam nganmi le vanlawng in hrawh le tukkahnak an tuah khawh tiah a chim chap rih.
Hiti bantukin ruruhranghran in cawlcanghmi donghternak caah le hmailei Myanmar ram sernak ding caah NUG acozah le mizapi buu hna hi ramkhel leiah hmai an nor khawhnak hnga thapek an hau a ti. Cun NUG acozah nih Rohingya kong ah ruahnak a ngeihmi hi hmailei caah ruahchan awktlak in a biapi tuk hringhranmi a si i kan conglomh hna, cun ASEAN nih an chuahmi tuah le tuan dingmi phun (5) zong kan cohlan fawn hna, ram dirhmun a chiat tuk lo lioah hin tuah tuan kho hna seh ti kan duh ko tiah forhfialnak a tuah. Ref. Khit Thit Media
