Thailand ngandamnak zung nih July ni 11 ahkhan China ser Sinovac covid vaccine raikhamsi voi hnih tiang aa chun cangmi Thailand ngandamnak riantuantu pawl cu COVID-19 zawtnak an kai than i, an thazaang thawnternak dingah sii dang kan chunh nolh hna tiah an chim.
Tuluk ser Sinovac covid-19 raikhamsi voihnihnak tiang aa chun cangmi minung 677,348 ngandamnak riantuantu hna chungin 618 cu zawtnak an kai than timi cu, Ngandamnak zung lei April le July thla tiang an data ah hmuh khawh asi. Nurse sayamah pakhat a thi i, pakhat deuh cu a nunnak caah thinphang dirhmun taktak a phan ko tiah Channelnewsasia nih a langhter.
Thailand ngandamnak zung Senior health official Sopon Iamsirithawon nih avoi thumnak chunh kan timh cang hna tiah a ti. Cun tutun avoi thumnak dose ah chunh dingmi raikhamsi cu Tuluk ser si ti loin phundang AstraZeneca siloah mRNA vaccine an si lai tiah July ni 11 ahkhan a chim.
Atu hi Thailand nih a rammi vialte hna covid khamsi vaccine chunh dingin American ser Pfizer cu 20 million a cawk cang, cucu October thla dih lei hrawng ah a phan lai tiah ruahchannak ngeih a si.
Hi lio ah hin Myanmar ram caah SAC Ralkap nih Tuluk ser Sinovac covid raikhamsi 3 million a cawk, 1 million cu a ralaimi zarh chung ah a phan ding a si i, July thla dongh lei ah adang 2 million a phan ding a um than rih tiah Ministry of Health and Sports zung in theih a si tiah BBC nih a tial.
