Sagaing ramtthen, Monywa le Sai Pin kar motor lam cung hmun pakhat ah Min Aung Hlaing ralhraang sibawi pakhat cu thah a ton hnu ah an mah ralhraang pawl lila nih a thli thup tein a ruak an phum tiah CDM tuah tu ralbawi Khant Ko @ Captain Zero nih social media cung in a thlah.
Ralhraang sibawi pakhat simi Captain Than Myint hi a luan ciami September ni 17, kum 2021 ah khan a ho nih thah ti theih lo in thah a ton hnu ah a ruak zong ralhraang pawl lila nih a thlithup tein an phum, “thih hmanh ah chungkhar le mipi theih in a thi kho lo, ralkap zaammi chungah an khumh rih, a kaltaakmi a chungkhar hna zong zei hmanh ah an rel piak hna lo” tiah Captain Zero nih a ttial.
Ralhraang pawl nih a thlithup tein a ruak an phum hnu ah silei ralbawi Captain Than Myint cu ralkap sakhan in a zaam tiah Monywa khua ihkhun 300 ralhraang sizung in Major Min Soe Oo nih thah a tongmi sii lei ralbawi a chungkhar hna le cunglei an pu le hna sin ah lih le hrokhrol in thawng a thanh hna.
“Mah range hmunh khawhnak ding caah nuhrin covo an buar chihmi le lih le hrokhrol in thawngthanhnak an tuah, zei tluk in thuh le hloh an timh zongah an thup kho ti lo” tiah Captain Zero nih cun a ttial chap. Captain Than Myint hi No.3 ralhraang sizung le ihkhun 300 ralhraang sizung (Monywa) ah rian a ttuanmi si.
