Myanmar ramchung ah hitluk in Covid-19 zawtnak rai a karh thluahmah lio ah, SAC ralkap nih mizapi cungah dawtnak zawtruahnak lungput ngeih lei si loin Covid zawtnak rai tu kha hriamnam bantukin mipi khamnak le dohnak caah a hman tiah National Unity Government (NUG) nih nihin July ni 13 ahkhan a chim.
Covid zawtnak mizaw kong he pehtlai in ram mizapi hna i thlopbulnak ding kongah a lamkip in khamnak le phihnak a tuahmi tehna, cu lawng si loin thonginn chung zongah covid in mizaw a thimi zong an karh chin lengmang timi tehte hmangin theih khawh an si len ko tiah NUG lei nih an chim i an mawhchiat rih.
NUG acozah lei rampi covid i runvennak lei lutlai Dr. Zaw Wai Soe nih social media hmangin atu bantukin thawngthanhnak le theihternak a chuah cu a si. Hi ca a chuahmi lakah hin, ramkhel kongah tlaihkhih i thongthlakmi vialte felfai tein an ngandamnak i zohkhennak nawl pek ding timi siseh, thong thlakmi pawl hna hi zeihmanh nehnang ngei lo le hawi he i lo loin chuah dih ding tiah ralrin a peknak hna cu ca a chuahmi lakah aa tel.
Hi pin ah, SAC ralkap nih hi langhtermi pawl hna hi zeihmanh tuahpiaknak a um lo asi ah cun a cangmi thil vialte kongah tuanvo an lak dih ding a si lai i, ram mizapi duhning bantuk tein phungning tein fak taktak in tazacuai i azizut an si lai tiah ralrin a pek hna.
Atulio Yangon, Insein thonginn chungah covid zawtnak rai a lut timi theih a si cang, cu tikah aluancia July ni 8 thawk in khan thonginn luhchuahnak kawtka gate cu lockdown khar a rak si i, thil dangdang zong an phihkhar dih tiah theih a si. Zunthlum zawtnak a ngeimi kum 79 upa NLD hruaitu lutlai U Nyan Win zong covid a positive caah Insein thonginn in Yangon Sizungpi ah an thial i i zohkhenhnak pek a si. Crd. BBC
