Mandalay, Minchien khuami National League for Democracy (NLD) party chungtel nuva hna cu aho mizei theih lomi hriamkeng phu hna nih an umnak inn ah kan hnuzarh Cawnningani zan ah khan meithal in an kahthah hna tiah Irrawaddy nih a tial.
Mi tampi nih theihhngalhmi siangcachim le Minchien khua i NLD party chungtel in rian tuan lio cuahmah simi U Moe Heing (kum 50) cu a nupi Daw Su Su Hlaing he an pahnih in kan hnuzarh cawnningani zan suimilam 7 hrawngah khan anmah innchung ah atu bantukin thah an ton hi a si tiah theih a si.
Ralhrang ralkap pawl nih an dirhmi Pyu Saw Htee Group buu pawl nih hi hna nuva tel in Minchien khua NLD chungtel minung 38 cazin an chuah dih hnu tlawmpal ah hi bantuk thil phun mi thahnawnnak a hun can cu a si. Cun acozah zung pawl, sianginn, zung riantuan pawl, sizung pawl asiloah adangdang pawl cungah dohnak a can ahcun hi min cazin chuahmi minung 38 cungah fak taktak in azizut dantatnak tuah an si lai tiah Pyu Saw Htee Group buu pawl hna nih an rak tlerhkhawn hna.
Hi nuva hna hi an rak i thuhnawhnak hmun in Minchien khua No. 3 sang an umnak inn i an kiar than hnu nihnih chungah atu bantukin thahnawn an ton hi a si tiah khuami pakhat nih a chim. Minchien khuachung NLD party chungtel pawl Ralkap pawl nih an tlaihkhih hna ruangah hi nuva zong an zaam i an rak i thuhnawhnak cu a si. Mah hi mi thahnak a can hnu tlawmpal ah Ralkap pawl cu an rak ra phan ve colh i, minung pakhat zong an tlaih chap rih tiah khuami hna nih an chim.
