Myanmar nih a cawkmi Tuluk ser Sinovac covid raikhamsi 1 million cu a ralaimi zarh chung ah a phan ding a si i, July thla dongh lei ah adang 2 million a phan ding a um than rih tiah Ministry of Health and Sports zung in theih a si tiah BBC nih a tial. Sinovac raikhamsi hi vawleicung ngandamnak buu (WHO) nih lakhruak (emergency) dirhmun caah hman khawh tiah theihpinak cu June thla ah rak pekmi a si.
Hi sii zong hi India ser Covishield raikhamsi chunh lio bantuk khan papak in timhmi minung deuh hna sinah chunh hmasa an si ve lai tiah Ministry of Health and Sports zung chimnawlngeitu Dr. Khin Khin Kyi nih a chim. Tuluk nih Myanmar ram caah COVID-19 raikhamsi ting 5 zong a luancia May thla ah khan a rak hlut cang hna.
Ralkap Council lutlai Min Aung Hlaing Russia ram a tlawn ahkhan Russia ser covid raikhamsi 2 million a cawk ko nain Tuluk ser hi tuan deuh ah a hung phanmi a si. Atu ahhin Ralkap Council nih Russia sinah Russia sermi raikhamsi 7 million cawk than dingin an timh rih.
India sinin a million in an rak cawkmi Covishield tu cu India ram covid dirhmun a chiat tuk ve ruangah a rau kho deuh rih men tiah ngandamnak lei riantuantu nih an ruahdamhning ahcun a si ko.
