Ayerawaddy Pengkulh, Laputta khua i Covid-19 positive pawl hna cu zohkhenhnak ding a hmun lawngmi a um lo ruangah kum 50 tanglei mizaw pawl cu inn ah mahte vai i thlop dingin an lawiter hna. Laputta khua ahhin covid-19 a ngei tiah fehtermi hi minung 80 leng an um cang i, hiti tutan covid in a zawmi hna hi sii-ai lei thlopbulnak siseh, cun eidin lei le thurdirnak le umnak lei tiangin a herhning bantuk in zeihmanh i zat awk in tuahpiak a um lo tiah a hmun ummi pakhat nih a chim.
“Oxygen (SOP2) level 93 tang a tla/tummi kum 50 cunglei mizaw pawl lawng covid test-nak kan tuah cang lai i, thlopbul le zohkhenh an si cang lai. Kum 50 tanglei simi paoh cu kan in chek ti hna lai lo, inn ah nanmah tein va um u law, sii nan duhmi um ah cun chim u tiah sizung lei hna nih ri an khiah i keimah zong an ka chimh vemi si. Quarintine cu um ko seh, sizung hmanh ah hmunhma felfai tein mi an pe kho ti hna lo”
“Tirawl zong an pe kho hna lo, kanmah lioah khan cun Quarintine pawl zong zeihmanh an lungrethei lo, fimcawnnak zung vuanthan le adang zong kha kan timhlamhpiak dih khawh hna, cucaah hi vialte a ruangah cu Uknak Ri Ralkap asi ko, an duhduh in mi an kahthah, a can paoh cang seh timi lungput ngeih khi a si ko” tiah Covid zohkhenh lei volunteer riantuantu Laputta khua CDM siangsaya tuanmi pakhat nih a chim.
Laputta khua hi covid zawtnak kaimi an zohkhenhnak hna Sizungpi le Sipin Guest house ah covid mizaw thar an tam tuk cang ruangah covid mizaw pawl chiahnak ding hmunhma a um ti lo, cun Ralkap Council lei hna zong nih hmunhma timhtuahpiaknak zeihmanh zong a um lo.
Laputta khua Covid-19 positive zaw pawl chungin a cheu uak hrawng cu palek le zung dangdang vuanthan pawl an si tiah theih asi. Mizzima
