Kachin Independence Army (KIA) ukmi hmunram Mai Jayang khua chungah Covid-19 positive mizaw minung 200 lengkai an phan cang tiah KIA lei in thawngthanh lei tuanvo ngeitu Col. Naw Bao nih a chim. Atu zawtnak hmuhmi a tam u hi Mai Jayang i sianghngakchia cheukhat sinah a si i, atu hi test-nak zong pehzulh in kan tuah tualmal rih ko tiah a chim.
“Mizaw pawl cu a dang tein kan chiah hna. Positive a ngahmi hna zong an ngandamnak a tla tuk an si lo an tha ngai ko hna. Ahlankan in ralring chungnak zong Mai Jayang ah biatak tein kalpi a si. Mi a bubu in khua chung luh chuah zong kan khap” tiah Col. Naw Bao nih BBC ah a chim.
Mai Jayang khua cu Covid 19 runvennak komiti kan dirh i, Tuluk ram lei bawmhnak in Laiza khua le Mai Jayang khua ummi minung 20000 lengkai cu February thla thawkka khan Covid vaccine chunh an si tiah hika hmunram ummi mi zohkhenh le bawmchantu phu hna nih an chim.
“Atu covid mizaw kan hmuhmi hna hi a tam deuh cu avoi hnihnak covid vaccine raikhamsi chunh ding timhlamhmi an si i, chun lai ah test-nak tuah an si tikah atu bangin zawtnak kan hmuh hna cu a si. Raikhamsi aa chun lomi lakah hin mizaw positive tam deuh kan hmuh hna. Covid vaccine kong he pehtlai in pumpak in chunh a duhlomi an um. Zei ruangah tiah cun Tuluk sermi raikhamsi a si caah an hnasen a tla lomi an um ve. Micheu nih cun kan i chunh ah a tha ko tiah an i chun ve ko” tiah Mai Jayang ah kum 20 hrawng a um cangmi upa pakhat nih BBC ah a chim.
Ral tih ruangah a zaammi an umnak (IDP) camp pawl zong a um caah, a bubu in khuasaknak hmun a si tikah hi hmun ahhin covid zawtnak a lut sual lai tiah kan thin lawng a phang ko natein atu dirhmun tiang test-nak tha tein kan tuahmi ah IDP camp pawl ah covid zawtnak pakhat hmanh kan hmu rihhna lo tiah hmunram ummi hna sinin theih a si.
“KIO lei zong nih bawmhchanhnak an kan tuahpiak len ko. Atu dirhmun ahcun ngandamnak lei he aa peh tlaimi tirawl tha, nutrition le vitamin pawl bawmhchanh a herh. Covid i khamnak ding thilri pawl, hmurhuh (mask) , PPE hruk ding, kut tawlnak sii-hang pawl an si. Hika hmun ahhin cun khuami i ti hi a tlawm, cun nu le pa he a dang cio in i then i umnak a si tikah hngakchia hna caah nutrition an herh. Cu pinah, IDP camp ralzam dornak hmun ahhin lockdown tuah a si tikah eidin tirawl kan herh, cu pinah kum upa tar deuh pawl hna caah hin oxygen a herhmi dirhmun tiang kan phan sual lai ti hi thinphang a si” tiah a hmunhma mibawmchantu pawl hna nih an chim.
