Sagaing pengkulh, Katha khuaram ah KIA le PDF i fonh in ralkap he i kahnak nili chung an ngei i, ralhrang ralkap bawi tel in minung 180 an thi tiah Sagaing-People Defense Force (Sagaing-PDF) nih nihin ah official tein thanhnak an chuah. Katha khuaram chung dirhmi PDF hna hi KIA Tatmahar 8 le Tatyin 5 hna hrihhruainak in Uknak Ri Ralkap Tatma 88 le Katha Tatyin 304 le 309 pawl hna cu Myohla khuate pawng ah an kah hna.
July ni 5 zanlei suimilam 9 hrawng ah PDF le KIA nih mine-bomb pahnih an kamhmi nih ralkap minung 10 nak tlawmlo a thah hna, cun July ni 6 suimilam 8 hrawng thiam ah khan ralkap minung 100 citnak tilawng pathum cu KIA le PDF nih RPG in voi tam ngai an kah hnuah, pahnih cu pil lak in an kah khawh, hi ahhin ralkap minung 60 renglo an thi i, tilawng pakhat cu lo diam in a tli i, a tlau tiah theih asi.
July ni 7 zan suimilam 10 tluk ah mine-bomh kamhmi pathum an i ton than i ralkap bawi pakhat tel in adang minung 30 nak tlawmlo an thi than tiah theih asi tiah thawng an fianter.
July ni 9 zanlei sang ah Katha 309 Tatyin, Myohla ah a rak lutmi ralkap Double Cub 1 le keruk ngei motor pakhat hna cu Pauma Myaing le Katha karlak ah KPDF le KIA fonh ralkap nih kah than nolh an si tikah ralkap lei 30 nak tlawm lo an thi than tiah thawng an chuah.
Katha khua PDF nih Katha khuaram chungah ningcang loin tlaih a tongmi, ningcang loin thahnawn a tongmi kan mipi caah Mi thattu, mi that hmang ralhrang Ralkap pawl hi a hram in a bongh le a ci hmih dih hlan chung paoh cu ral i kahnak hi kan pehzulh peng cang lai tiah an thanh. Crd. Katha People Defense Force – KPDF
