Myanmar, Sagain Region,Kalay ah November 4- December 4 nizan tiang ah khan Africa Vawk zawtnak a si lai tiah zumhmi Vok zawtnak ruangah vawk 40 reng lo an thi. Vawk thi mi hna cu Vawk ngan mi 21 le a fa deuh mi 22 an si. Tuchunni tiang Kalay Myo ah Vok thi an um peng i cu a thi mi an Vok ruak cu vawlei ah phum lo in tiva hna le Leikuang kam naih, mawtaw lampi kam naih ti bantuk ah khin a ruak cu an hlonh hna.
Kalay Myo khua lai ah a luang mi Upohchawng tiva ah vok thi ruak an hlonh mi cu tiva nih a rak fenh mi cu hmuh lengmang a si. Mah cahcun Kalay Myo tiva kam naih i khuasa mi hna caah fihnung lawng hmanh si lo in ttihnung taktak khi a si. Nai hrawng Kalay Myo cu Covid-19 zawtnak nih biatak tein a buaiter cuahmah lio ah Vok pulrai a tlung tthan i lungrethei taktak khi an si.
Kalay Township chung i vawk zuat mi hna nih an zuat mi Vok pawl hna cu Mizoram lei ah biatak te i an zuar tawn caah Mizoram kan unau tiang thinphang in an um dih cang tiah theih a si. Mah caahcun zeitluk i Voksa a duh mi nasi ko zong ah Voksa pulrai a um chung te tal hi cu ei lo in um khawh kha rak i zuam ve.
Mi tampi kan duh taktak mi le ei lo in kan um khawh bak lo mi cu Voksa khi a si. Voksa cu minung kan damnak caah a ttha lo tukmi a si ko nain minung tampi nih ei lo in kan um kho lo. Voksa cu thikai zawtnak a ngei mi hna nih tam tuk an ei sual ahcun an nunnak tiang hmanh a liamter khotu a si.
Zeitluk in a ttha lo ti kan theih ko zong ah ei lo in kan um khawh lo cem mi cu Voksa a si caah theih hrimhrim a herh mi thanwgpang a si caah siaherhnak he kan vun langhter nak a si. Hi ti kan ttial ruang ah hin Voksa ka ei lo ka ti nak cu a si hlei lo, keimah zawng nih ka ei mi le ka duh tukmi saphun khat a si.
Hmanh sehlaw zeitluk i kan duhmi a si ko zong ah Voksa in zawtnak ttihnung a chuak ruang ah a si khawh chungin hrial khawh i zuam cio hna u sih. Kalay Myo, Taungphila sang ah Vok zawtnak a chuak liopi a si caah ralring taktak a herh lio caan a si.
Mipa pakhat minlanghter lo nih Voksa a ei ruang ah hmanthlak i ka rak langhter bantuk khin a taksa vialte cu ttihnung taktak in hmachia nih a chuah dih. Covid-19 zawtnak ruang ah hi tluk lungrethei i kan um lio ah zawtnak dang a chuak tthan mi theih cu lungrawk taktak khi a si.
Cu hlei ah minung tampi nih ei lo i kan um khawh bak lo mi Voksa in a chuak mi Vok zawtnak a si chinchap ti vun theih cu Voksa a uar mi le a duh mi hna caah cun lungrawk taktak khi asi. Vawi khat awr isum khawh lo ruang ah ttihung taktak mi zawtnak ngeih khawh a si ti kha philh hrimhrim hna hlah u sih.
