Kachin ramkulh i Pathian riantuanmi pastor pathum hna cu rampi daihnak ding thlacamnak puai an tuah caah thong kum thum tla dingin dantat an tong tiah International Christian Association phu pawl nih nizan ahkhan Premier Christian News hmangin thawngthanhnak an tuahmi ah an langhter tiah RFA nih a tial.
Kachin Baptist Convention (KBC) nih Pastor pathum hna cu zapi kha thihphaihnak nan tuah/chim tiah thawngpang a hmaanlomi nan zamh timi case ahmuh in khan Rawang Literature and Culture Committee (RLCC) nih taza an rak cuai hna hnu, June thla ni 28 ah khan tlaih an rak si. Hi an tlaihnak hna hmunhma thawngpang an thlahning in khan cun RLCC hi Ralkap Council phenah a cawlcangmi phu asi e tiah an langhter.
Ralkap pawl nih hramhram in uknak an lak hnuah hin, Kachin ramchung khrifa sianginn pawl cu Uknak ri pawl Ralkap Council nih luhhnawh in hnahnawhnak le hremnak phunphun an pek hna tiah theih a si. Cun tutan ah tlaihkhih a tongmi Pastor hna hi kum 60 leng a kai cangmi kum upa lei an si caah an ngandamnak zong a thalomi an si hna cucaah biatak tein thlacampiak ding tiah Kachin Baptist Convention le RLCC kaphnih nih anmah social media in thlacam an cah.
KBC nih hi pastor pathum tlaihkhihmi hna hi thlacamnak dah tilo thil dang zeihmanh tuahmi le palhnak an ngei lo, cucaah nan kan chuahpiak colh hna lai tiah an nawl hna. Atu bantukin thong thlak ding dantat an si taktak ko ahcun cucu zeiti lei hmanh in pom awk a tha lomi thil a si ko hnga. Nan kan chuahpiak hrimhrim hna lai. Zei tatte hmanh um loin thong thlak asi ding si ahcun, rampi huap minung vialte thonginn nih a kan tlum bal ding a si lo tiah KBC chairman Dr. Clamson Swan nih Irrawaddy sinah a chimmi chirhchan in Premier Christian News ah a langhter.
KBC tel in Kachin ram khrihfa buu vialte hna cu thlacamnak puai pawl an tuah lawnghmanh si loin hramhram in rampi uknak a fiartu Uknak Ri Ralkap pawl duhlonak langhternak sandahpiahnak kip ah an i tel hna. Crd: RFA
