International Court of Justice (ICJ) tazacuai lioah NLD cozah nih a rak hlanmi Sihni (lawyer) thiamthiam kha tutan tazacuainak zongah hman nolh than a si lai tiah Ukri pawl Ralkap Council lei thawngthanhtu buu hna nih thanhnak an tuah tiah Irrawady nih a tial.
Kum 2019, December i Netherland ram The Hague khua ah rak tuahmi tazacuainak kong he pehtlai in Upadi lei thiamsang rak hlanmi Dr. Christopher Staker nih khan tutan ICJ chuah tik zongah Myanmar ram aiawh in a dirkamh than lai tiah Ukri pawl Ralkap Council lei thawngthanhtu buu hna nih an chim.
Cun Ralkap Council lei nih tutan ICJ tazacuai lei hrihhruaitu ding buu zong kan dirh cang tiah June ni 18 ahkhan an rak thanhve cang natein hi tan ahhin mah tazacuainak ahhin hrihhruaitu ding taktak Sihni aho dah an hman lai ti kongkau belte cu an rak chuahpi in thah chih um lo.
Cu pinah, Sihni hlan man kong he pehtlai in thawngthanh kan i timlaam rih lo tiah an ti rih. Hi tazacuainak ah hin, hrihhruaitu committee lutlaitu hna cu Ralkap Council nih khanhmi Minister of Foreign Affairs in U Wunna Maung Lwin, Minister of International Cooperation in U Ko Ko Hlaing,le Attorney General of the Union lei in Dr. Thida Oo hna an si lai.
Hi ICJ tazacuainak ahhin tutan ah dirhmi Hrihhruaitu Committee nih hin Gambia ram nih kum 2019 ah ICJ ah Rakhine ramkulh chungummi Rohingya miphun pawl cihmih thahnawnnak kongah Myanmar ram taza a rak cuaimi kong he pehtlai in an tlamtlin khawhnak dingah an hrihhruai lai i, Dr. Cristopher Staker hruaimi phu hna nih hin upadi lei he pehpar in ruahnak an chuah lai ti a si.
Dr. Christopher Staker hi England and Wales Attorney sihni upadi lei thiamsang pakhat a si i, NLD acozah chan lioah Myanmar ram aiawh in ruahnak petu sihni ah aa telmi a rak si. Crd. Irrawaddy
