Tachileih myone ah Thailand phaisa baht 300 ruangah thahnawnnak ttihnung a chuak. Thahnawnnak a chuak ning cu mah ti hin a si, December 10 zanlei suimilam 5:00pm tluk hrawng ah Shan pyine nichuah chak lei ah um mi Tachileih myone, Luaitawkhazan uksuh, Nghetpiotaw an tihmi khuate ah Ba Ce kum 39 pakhat cu a ruak in char a si.
A luu ah fak ngai khin hliamhma an hmuh caah palik nih hlathlai nak an tuah colh i a thi mi Ba Ce kum 39 i a inn chung nu cu palik nih bia an hal i December 9 inn kan um lio ah khin ka vapa cu leng ding in leng ah a chuak i a rak lawi tthan ti lo caah kan inn pa pawl cu kai sawm hna i kan va kawl i tu bantuk in a ruak in kan hmuh hi a si tiah palik sin ahcun a chim.
Ka vapa Ba Ce Aadi khuate le Nghetpiotaw an tihmi khua karlak mawtaw lampi kam ah burbuk tang ah khin a ruak in kan va hmuh tiah a chim fawn. Ba Ce thihnak kongkau ah lunghrinh deuh an neih mi Aa Zuh kum 18 mipa cu Nghetpiotaw khua mino rual nih an tlaih colh. Bia an vun hal tik ahcun Ba Ce nih ka thlau mi phaisa baht 300 ka thlau mi nai hmuh maw tiah ka ti tik ah khin a thinhang cawlh i awka faktak in a rak leh caah thingtan kai lak i thi lak in ka tuk ko tiah a chim.
Aa Zuh kum 18 nih cun Ba Ce te inn ah va kal in nan inn ah phaisa baht 300 ka thlau nan hmu maw tiah a va hal tik ah Ba Ce he cun an karlak ah biael nak a chuak i ka thin kaisum khawh lo ruang ah thingtan kai lak i thi lak in ka tuk ko tiah a chim. Phaisa baht 300 ruang te hna i mi nunnak lak diam ko cu ngaihchia taktak khi a si.
