Biaceihtu (judge) sermi phungbia (common law) ah Victoria Police nih tlaihnak nawl an in ngei lo. Asinain Victorian Parliament sermi phungbia Crime Act 1958 tang ah Victoria Police nih tlaihnak warrant lo in, tlaih khawhnak lam pahnih an ngei.
Lam Khatnak – Crime Act 1958 (Vic) s 459(1): Level 1 – Level 6 a simi sualpi a tuah rua tiah Victoria Police nih reprai in an zumh tikah, tlaih khawh colh a si. Victoria ramkulh, asiloah, ramdang ah cu sualpi ngan cu, a tuah rua tiin an zumh ahcun, tlaih khawh colh a si. Police puhmi sualpi cu, sualpuhmi nih a tuah lo tiah biakhiaktu Jury nih an ti zonag ah, Police cung ah zeihmanh tuah khawh a si hlei lo.
Lam Hnihnak – Crime Act 1958 (Vic) s 458(1): Sualte le sualpi a huap. Sualte (zapi lak zurit tbk.) tuah liomi paoh tlaihnak nawl an ngei. Victoria Summary Act 1966 (sualte phungbia) le Crime Act 1958 (sualpi phungbia) a chimmi sual phun poah a huap. Cu bantuk sual a tuah liomi minung cu, Victoria Police chim lo, pumpak minung hmanh nih tlaihnak nawl kan ngei. Cuti tlaihnak nih aa tinh bikmi cu, sual tuah lio minung kha biaceihtu hmai ah chuahpi awk, asiloah, a sual tuah lomi khamnak caah a si.
Zatlang hmun i cilcak ruang ah tlaih, asiloah, tangka dantat khawh a si. Midang takpum ah cil chak lebang cu, sualfak ah an ruah. (1) Fih a nung (2) Zawtnak chawnh kho a si tiin an ruah. Zunzun lebang cu, a si te a si bak ti lo (i ceh sual cu, a kong ka thei lo).
Victoria Palik Tlaih Na Ralchanh Ahcun, Thong Kum Aa Chap: Sualte pakhat a tuah liomi minung nih palik, asiloah, zaran minung i an tlaihnak a ralchanh hna, an takpum ah a kheuh hna ahcun, Crime Act s 31(1) a buar caah a tam bik kum 5 thong tlak khawh a si. Palik tlaihnak a ralchanh ahcun, a fak bik ning in kum 5 bak thong tlak khawh a si. Palik kheuh cu, phungbia nih fak khun in a chiah.
Phung Lo Ning Tlaihnak Ralchannak Nawl Na Ngei: Nguyen v Elliott taza cuainak ah na covo a lang. Victoria Police pahnih nih awmang lo tuk in Nguyen takpum ah ritsii an chek. A duh lo, a ralchanh hna. Kan in tlaih, an ti i, zaangtal in an tlaih. Nguyen nih palik pahnih cu a chuih hna, palik pakhat lebang cu, a seh le taza an cuai.
Victorian Supreme Court nih hitihin bia a khiah: – An tlaihmi kha phung lo ning in a si caah, (Nguyen nih) kha nak fak deuh hmanh khan tuahhmuahnak nawl a ngeih hna tiin. Cucu phungbia ah aa cang, High Court of Australia zong nih a fehtermi a si. Hi ca hi legal advice a si lo i, thei tling lo in, na hman sual ahcun, keimah mawh a si lai lo. Crd: Salai B Chan Khar
