A luan ciami August ni 29, kum 2021 ah American nih Afghanistan ram khualipi simi Kabul khua ah Taliban ralhraang pawl Drone in an kah hnanak ah hngakchia pa 7 telh in minung pa 10 an rak thi, hi hngakchia thihnak kong he pehtlai in Pintagon lei nih nizan September ni 17 ah khan nawl patnak a vun tuah.
Afghanistan ram in an ralkap pawl an kir hnu, hmunung bik minung laak a vun dih lai te ah ISIS ralhraang phu nih nun pek bomb puahnak an tuahmi hi Afgahnistan miphun lawng si loin US ralkap zong pa 10 leng an rak thi, cu hnu zongah ISIS nih cun bomb kan puah tthan lai tiin tlerhkhonhnak an tuah caah US lei nih bomb puah ding tiah ruahmi minung cu Drone hmang in an rak kah.
Mah ti an kahnak nih hin Kabul Airport ah ummi an ralkap pawl le an Afghanistan ram chuahtaak in zaam aa timmi hna pawl venhimnak zei maw zat a chuah ter khawh lai tiah ruahchannak an rak nei, a si nain sualnak nei lo hngakchia pa 7 telh in minung pa 10 an thihnak kong ah cun kan lung ttha ve hrim lo tiah US Army Chief of Staff simi General Frank McKenzie nih a chim.
Cu ruangah Drone in kan kahnak ah a thimmi hngakchia telh in minung pa 10 hna kongah hin ttuanvo neitu kan si bantuk in liamhnak pe ding in timhtuahnak kan nei tiah General Frank McKenzie nih cun a chim chap. Afghanistan ram uknak thar tlai tu phu in biachimnak nawl nei tu Zabihula Mujahit nih cun US drone kahnak ah minung pa 7 an thi tiah a chim.
