Kayar (Karenni) ramkulh, Dimawso peng, Kungta khua le ah ralhraang thazaang tam ngai ngai in a vun rami Min Aung Hlaing uico pawl le KA, KNDF le PDF ralkap hna aa fonhmi nih tuni September ni 25, kum 2021 zing suimilam 8:45AM in zan suimilam 7:00PM tiang bak an i kap.
Chunnitlaak an i kahnak ah Min Aung Hlaing ralhraang lei in pa 10 nak tlawm lo an thi i hliamhma pumi an tam ngai, cun Karenni ralkap lei in ralkap pakhat nih ram le miphun caah a nunnak a pek ve. Tuni chunnitlaka an i kahnak ah Dimawso peng, Kungta khua ohsuh, Tesulee khua le Kyoke Se Khan khua hna ah si i Dimawso peng chungah hmunhma khuami ralhraang sakhan lei nih hehchet tiah bomb kahnak in an rak bawmh chih hna.
Min Aung Hlaing ralhraang pawl hi Kungta khua le Tesulee khua ah hmunhma an khuar hna i khua chung inn cheukhat mei in an khangh piak hna, kaphnih kar kah dohnak ah an mah ralhraang lei in pa 10 nak tlawm lo an thih hrim cun an ingpuang chin i ruahpadamh in bomb an kah thluahmah.
Dimawso peng chungah KA, KNDF le PDF ralkap hna do ding hin Min Aung Hlaing ralhraang pawl nih thazaang tamlak te an chap hnu ah an mah lei nih do ding in an luh hnawh hna, a si nain teinak an hmu kho hlei lo, ralhraang pawl hi cu zei hmanh hriamnam a nei ve lomi mipi cung lawng ah a ngamhmi an si timi hi a fiang tak tak si.
