Yangon ramtthen, Daw Pone myone chungah tuni September ni 8, kum 2021 zing suimilam 8:45AM ah khan Min Aung Hlaing ralhraang pawl sin ah thawng petu simi dalan pa Lwin Myo Oo cu a ho ti theih khawh rih lomi hna nih meithal in thilak an kah tiah thawngpaang theih a si.
Hi kong he pehtlai in mit bak in a hmu tu pakhat nih “Daw Pone lawng dinhnak hmun (palik zung hmai) ah an kah, a nupi he an kal tti lio ah an kahmi si, a mah he kal ttimi nu cu an kap lo, meithal hin zun 4-5 hrawng in an kah i an kahnak hmun bak ah thi” tiah a chim.
A tu bantuk in kah tongmi hi Daw Pone myone, See Set khuabawi i a tupa Lwin Myo Oo timi si, ralhraang sin ah thawng petu dalan a si, a nupi rianttuan nak kal ding in a thlah lio ah an kah, tu hi thil cannak hmun ah ralhraang pawl an an phan cang tiah Tharkayta News nih an langhter.
Lwin Myo Oo hi ralhraang sin thawng petu dalan a si tak le si tak lo Yangon Khit Thit Media nih fehternak an tuah kho rih lo, a si nain ralhraang nih khanhmi khuabawi rianttuan tu tupa si hlei ah khuami hna zong nih dalan a si tiah an chim tawnmi cu si.
