Tuni May 16 Mindat Kan Unau Hna An Dirhmun

CDF mipi ralkap hna cu khuami an temtuar tuk sual lai tiah May 15 zan ah hnu an tolh, khuapi chungin an zukphiak. Cuti khuapi chungin aa zukphiatmi hna cu rallokap nih May 16, tuzing 7 le cheu hrawngah an kah than hna tiah khuami pakhat nih a chim. Fak piin kah cu a si lo, an ngiatthlai hna i pikpak in an kah hna tiah theih a si.

NUG nih a thanhmi ah cun Mindat khua chung i lakphak dawr pakhat ah ralhrang nih nu cheukhat cu nu le pa sualnak he pehtlai in nehsawh zomtaih in an tuah hna ti a si. Khit Thit Media
Hnutolh Poah Hi Sungh A Si Lo. Mipi ralkap CDF hna cu khuachung mi hna May 15 zan ah khuapi chuahtak in hnu an tolh tiah theih a si. Cuticun Mindat khuapi cu ralhrang nih caankhat chung an uk lai tinak a si.

Mipi ralkap hnu an tolhmi hi a ruang a um. Cucu ralhrang nih an tlaihmi mini hna kha meithal an hmuah in ralphaw ah an hman hna i khuachungah an lut. An hmuhmi poah an tlaih hna, an kah hna. Inn le biakinn, anmah phungki pura tiangin an kah, an hrawh. CDF nih an kah chih hna a si ahcun atu nakin mini an temtuar deuh lai. Inn le lo zong a rawk deuh lai. Cucaah mipi le khuapi zawnruat in CDF hi hnu an tlolh chungnak a si. An tolh thai lai lo.

Hnutolh poah hi sungh a si lo i hmainor poah hi tei a si dih ve fawn lo. A caan caan ah cun teitu si nak dingah hnutolh a herh tawn. A sungmi bantukin um a herh tawn. Cun hnu an tolhmi a thatnak dang pakhat cu an tha an i hrim kho lai. Atu ah kap chih ve hna sehlaw an sung thai ko lai. Ralhrang nih cunglei he tanglei he a kah hna, an hriam a tha, a minung zong an tam. CDF lei cu mah serchom hriamnam lawng an hmang. Cu pinah khuadang CDF zong an phan manh lai lo.

Cucaah cun CDF-Mindat nih fimkhur tein khua an ruat hnu an tolh rihnak a si. Hnu an tolh chungah an tha an i hrim lai, kahdoh ningcang tha tein an tuaktan khawh lai, khuadang CDF zong an phan manh lai. Cucaah Mindat CDF hnu an tolh hi sungh a si lo, teinak dingah an tha an i hrim, an i funtom tu a si ti hi keimah pumpak hmuhning a si.

Atu hi Chin ramkulh CDF dihlak si hna seh, ramkulh dang le ramthen hna i PDF vialte si hna seh khua an khang cuahmah ko. A rau lomi kan hmailei ah khin cun nikhat, zankhat, caankhat ah an tho lai. Mindat khuapi cu CDF nih an lak than lai. Myanmar ram ah ram-ui ralhrang rual cu an cungah mipi nih bia kan ceih caan a phan lai. Crd: TCP

Total Page Visits: 340 - Today Page Visits: 1

Leave a Reply

Your email address will not be published. Required fields are marked *