CNF/A ( CDF) Chin ralkap hi zeimaw caan ahcun nu zuangzaam hna an lo thulh, siloah man ngei lomi ah ai chiami hna an lo, a caancaan ah tile an man an van i thumh hruk( သိက္ခာကျဆင်းစေတယ်). Ziah tiahcun mipakhat, siloah cozah thar an van chuahin …” ‘Khah!! Kahdaihnak siloah cubantuk lungtlin biakamnak ( agreement or Accord) ‘kan tuah lai” an van ti hna paohah hawihlan cem lengmangah vikvak an ti.
Adang tlangcung hriamtlai nihcun Kawl zia cu tiah an kherhlei, an checkhlat ta hna. Nain zeicadah hitihin Chin ralkap nih hibantuk in rianrang in mizei he poah lethmat hi ol tein an thut hnga titik ahcun ….Chinmi le Chinram caah asi ko. Man a ngei tukmi le zumhawktlak tukmi Vakok nun a neimi an si ko. Chinmi le Chinram hi Kawl ralkap chiahru kuttang in kan luatnak lai aherh asi ahcun kan nunnak zong liam ko seh tiin a cawlcangmi an si.
Cheukhat nih phaisa fanghnihkhat te ruang, siloah an ralkap cheukhat tuahsernak ruangah heh tiah a chiatnak mitin kan zoh hna le kan soi hna. A phung siko. Dawtmi cu an tlamtlin lonak le an palh tiah kan hmuhmi cu chimhphung le ruahphung an siko. Nain thothan kho ti hna hlah seh timi puanzar phen lungput bel a tha lo ngai. Kan ram ah thimnak hmangin ( U Nu, U Ne Vun le 2008 ) zeitihmanhin kan duhmi zauk phung cu kan ngah kho lo ticu a fiang.
Ziahtiah cun pakhatkhat an duh poah ah hriamnam an i lak colh ko ( 1964, 1988, le 2021). Tikah kannih , miphun dang pawl zong, pawl zong hriamnam tha le ralkap tha kan ngeih ve a herh. Cucaah cu an hriamnam cungah teinsk kan hmuh khawhnak ding hnga hriamnam a hau ve( WA). Ramkhel pati le doctrines pawl a herh rih loh. Zeicatiah Kawl ralkap nih an i tlaihmi cu Mositong ( Tuluk an pa)nih ” Nawlngeihnak cu meithal kuanfang lawng ah aum” timi kha an i tlaih peng.
Cucaah cu kuanfang teinak dingah cun kuanfang a herh ve. Cu kuanfang le kuanfang nih bia an chim lotik tuah Ramkhel pati le Nannanzi mifim, thiam pawl an holh te lai. Cusicaah , hi ral ah teinak le teilonak kong cu um rih ko seh, atulio hi a leng buanbara cun nu zuangzaam a lo nain a chunglei in Vakok nun a neimi Chin ralkap an thazaang kan thawnternak hnga caan tha bik lio asi ko.
Nangmah luatnak na hmuh ahcun na techin fapar catiang asi lai. Sal sinak in Minak pawl an luatnak dingah thisen tampi a rak luang bang, pennak pakhat in pakhat luhnak dingah atam ucu hriamnam nih bia a chim hmasat tawn ticu vawlei tuanbia ah fiangpup in kan hmuh ko dahkaw. Crd: Cn Kam
