Magwe ramṭhen, Gangaw le Htee Lin kar lamthlur a zawh lio cuahmahmi SAC ralhrang pawl cu Yaw Defense Force -YDF nih nihin July 28, zinglei Sml. 7 hrawng ahkhan bomb hmangin an tukdoh hna tiah min chim duhlo YDF chungtel pakhat nih RFA ah a chim.
SAC ralhrang Kah-Lah-Yah 50, ralkap Truck Motor pali cu Gangaw in Htee Lin lei an panh cuahmah lio lampi ah YDF phu pawl nih bomb hmangin an rak phomh hna i Ralkap Truck Motor pahnih cu bomb nih a khen tiah a chim.
Ralhrang lei hi a tlawm bik 20 hrawng a thimi an um, cun hliamkhuai tuarmi hna zong an um fawn lai tiah a chimchap. Yaw Defense Force – YDF timi Yaw mipi vengtu ralkap lei cu a thimi le hliam tuar an um lo tiah YDF nih a chim.
Hi kong he pehtlai in thawng tialtu, latu nih a thimi le hliakhuainak a tuarmi cazin fiangfai tein a hmun ah hlathlainak tuah in a fehtermi cu asilo.
YDF phu pawl hna hi a luancia May thla ni 13 ahkhan an rak dirhmi a si i, Myaing People’s Defence Team (MPDF) le Magway Division People’s Defense Force – MDPDF phu pawl hna leti’n hmunkhatte ah aa fonh i a cawlcang ṭimi an si. Source: RFA/ A tanglei ah thawngpang (news) tawi tete relchap hna:
1). MoeNgin le Nansiaung check gate kam puakkehnak ah motor pakhat a rawk aa citmi belte an him: Kachin ramkulh, Moengin khua, Nanhsiaung le Mawhan khua kar Nansiaung check-gate pawngkam ah July ni 27 zinglei Sml. 7 hrawngah khan leikamh-bomb (land mine-bomb) a puak i motor pakhat a hrawh, aa citmi hliamhma pu an um lo tiah theih asi.
Leikamh-bomb a puak ruangah Monywa in Myitkyina kar khualtlawngmi Jingphawh shwemay motor thlalang an kuai i an rawk. Motor in khualtlawng hi minung paruk a um i, hliamkhuainak zeihmanh an tong lo tiah Khit Thit Media nih a ṭial.
2). Hakha COVID-19 Mizaw 211 nih Damnak an Hmu Cang: June 10 in July 26 tiang ah Hakha khuachung i COVID-19 mizaw 311 chung ah minung 211 nih damnak an hmu cang, tiah Hakha Christian Minister Fellowship (HCMF) ah Secretary a si i, Hakha Township Public Healthcare (HTPH) zong ah Team Leader a simi Rev. Dr. Stephen Lian Hup Ling nih a langhter.
June 10 in July 26 tiang ah minung 1,513 an check hna i minung 311 sin in zawtnak hmuh a si. 211 nih damnak an hmu ṭhan i a dang minung 8 hi an nunnak a liam.
Atulio ah COVID-19 zawtnak thlopbul liomi minung 92 Hakha ah an taang rih. A thimi minung 8 lak ah hin COVID-19 zawtnak a si kho tiin lunghrinh in a thimi an telh hna lo. Source: The Chin Journal
3). Mindat khua ah covid mizaw thar paruk an hmuh chap hna: Mindat khua Covid Volunteer Bawmtu phu nih July ni 27 thawng an thanhning ah cun Mindat khua chungah COVID-19 mizaw thar minung 6 hmuhchap an si i, atu in cun an dihlak minung 21 an ti cang i, a dam ṭhan cangmi minung 5 an si cang tiah Zalen sin in theih asi.
4). Kalaymyo chungah eidin lei bawmhchanh a herhmi nih pehtlaih ding mi bawmchantu: Kalaymyo ah Covid-19 zawtnak ruangah rian ngei lo le ṭuan kho loin a um i, harsatnak a tongmi inndawng 300 sinah facang, pe, le chiti cu July thla chungah an hlut cangmi hna an si.
Cucaah Kalaymyo chungah khua a sami chungkhar ah eidin awk harsatnaka tongmi pawl nih Khin Maung Thein (ဆရာခင်မောင်သိန်) Mobile Nambar: 09762645057 ah pehtlaihnak tuah i bawmhnak hal khawh a si.
Edit: July 28 (July thla caah innchungkhar dawng 300 bawmhchanh ding timi eidin thil pawl kan hlut dih cang hna. August thla ca hlut nolh asi tikah thawng thanhnak tuah nolh kan i zuam lai). Source: Zalen
