Nizan March 28 ah thilcawk ding in leng ah an chuak i an tlau, tiah an timi hna Buanlung khuami Cung Hlei Sang (kum 17), Van Nun Bawi (kum 17) le Roland (kum 18) cu ralkap nih an rak tlaih hna i Rungtlang 266 sakhaan ah an hren hna tiah thawng kan theih.
Hakha ah a ummi chungkhar hna nih, “266 kan hren hna tiah tu zanlei khan phone a kan chanwh. Tu zanlei ah Palik sakhaan ah kan ratpi hna lai i, rak donh hna u a kan ti,” tiah The Chin Journal ah an chim.
Buanlung khuami mino pathum hi nizan Hakha mei a mih lio ah kan an umnak Auto sang in thilcawk ding in leng an chuak i ralkap nih an rak tlaih hna hi a si.
Kalay Phak Hlan, Sithar Khua Pawng ah Mipi le Myanmar Ralkap an i Kap. Nihin zanlei sml. 5:00 hrawng ah Hmandaw lei in a rak rami Myanmar ralkap le mipi karlak kahdohnak Sithar khua phak lai ah a chuak, tiah thawng kan theih.
Gangaw lei in a rak rami ralkap motor pawl kham ding in lamthluan ah a ummi khuami hna nih thingkung an hau i, cu thingkung pawl thianhpiak ding in motor 4 hrawng in ralkap an rak rat hi a si.
Sitha le Natmyaung khua karlak ah mipi nih Lai meithal pawl in an orh ve hna i kahdohnak a chuak.
Zanlei sml. 5:45 hrawng ah meithal thawng a dai. Kap hnih in hliam a pumi le a thimi an um lo le um lo theih a si lo.
The Chin Journal
