Nihin October 29 kum 2021 zan suimilam 7:30 PM tiang ah Thantlang khuachung inn 110 leng an kaang cang i Zunghmun sang ah a ummi Presbyterian Biakinn zong mei nih a tlaih ve cang. Pu Ram Khar nih “COTR biakinn cu a kaang dih cang i zunghmun sang ah a ummi Presbyterian Biakinn zong atu a kaang cuahmah,” tiah a chim.
Inn a kanghnak bik hi TABC sang, Lungtial sang, Zunghmun sang le Biakinn sang ah an si. Atu ca kan ttial caan ah hin Zunghmun le Lungtial sang an kaang cuahmah rih. Atu bantuk i SAC ralhrang hna nih Thantlang khuapi an khanghnak a hram thawknak cu SAC ralhrang pakhat nih inn chung thil fir lio ah CDF Thantlang nih meithal in an kah thah hnu ah a meithal zong an lak piak.
Mah caah SAC ralhrang hna le CDF Thantlang lak kar ah kahdohnak peh zulh in a chuak i SAC ralhrang hna nih hin hriamnaam ngan in CDF Thantlang cu an kahdoh hna i mah hnu tlawmpal suimilaam 11:30am hrawng hrang ah khan inn kangh hram aa thawk hi a si tiah kan theih. Pathian nih Thantlang khuapi ka ven piak koseh, mipi kan hriamnaam tha bik thlacamnak in Pathin sin ah bawmhnak hal rih ko hna usih. Mipi kan caah a tha bikmi Pathian nih kan thlacamnak a kan leh ko lai.
