Chin ramkulh Tedim peng, Tedim le Tai Ngen khua kar, Su Zan khua pawng ah tuni September ni 24, kum 2021 zanlei suimilam 6:00PM hrawng ah khan PDF-Zoland nih Min Aung Hlaing ralhraang motor pa 2 bak an kah hna, Su Zan khua hi Kalaymyo in Tedim lei kalnak khua ah ummi si i Tai Ngen khua in meng 12 a hlaatnak ah ummi si.
Hi kong he pehtlai in PDF-Zoland, CDM ralkap lei in ttuanvo nei tu pakhat nih “minute 15-30 kar hrawng an kah hna, ralhraang motor pahnih an kah hnami si i pakhat cu a rawk ngai, ralhraang tlawm bik pa 6 an thi, hliamhma pumi zong an tam tiah pawngkam khuami hna nih an chim, PDF-Zoland lei in hliamhma pumi ho hmanh um lo tein hnu lei an sip tthan” tiah a chim.
Tuzing suimilam 10:00AM hrwang khan Falam le Tedim lampialnak zawn, Tai Ngen khua pawng ah Min Aung Hlaing ralhraang phur tu motor pa 5 a dir i zanlei muilai khan Tedim khua lei an kal lio ah an kah hna hi si, hi kong he pehtlai in a thimi le hliamhma pumi an um le um lo theih khawh si rih lo.
Kan ram dirhmun zoh tik ah Min Aung Hlaing le a ralhraang pawl cu nikhat hnu nikhat in sunghnak nih a hmel thluahmah cang ko hna, nikhat chung lawng hmanh ah tlangcung hriamtlai phu le mipi vengtu ralkap nih an thah hnami ralhraang hi an tlawm lo.
