Myanmar ram chungah Democracy a chuah tthan khawhnak ding caah tiin mipi kan i zuam cuahmah lio ah mipi a kan that cuahmah tu Min Aung Hlaing ralhraang pawl lei ah a ttangmi Kate hriamtlai phu hna cu Tamu Security Group nih ralrinnak a pek cang hna.
Kate hriamtlai phu hna hi Democracy ram simi India ram, Manipur state chungah zalong ngai in um duh loin Myanmar ram chung Sagaing ramtthen, Tamu khua ah aa rak dormi an si ko bu ah mipi lei ah dir loin Min Aung Hlaing ralhraang lei ah an dirmi le an ttanpi hna timi hi TSG nih fiang tein an theih cang.
A tu bantuk in ralhraang lei ah ttang in an dirpi hnanak le an cawlcanghnak hi a rannak in an ngol lo ah cun Myanmar ram chungah democracy a duh lo tu phu ah chiah le doh an si cang lai, tu lio Myanmar ram chungah ralhraang pawl dohnak Revolution hi a rauh hlaan ah a dih dingmi si cang caah hi lam zawhnak ah dawnkhan tu simi Kate hriamtlai phu hna hi Myanmar ram chungah umnak nawl pek an si ti lai lo.
Cu ruangah Kate hriamtlai phu hna nih a rannak in Min Aung Hlaing ralhraang pawl kaltaak ding le an mah he zei hmanh pehtlaihnak nei lomi, democracy a duh lomi ralhraang pawl bawmhnak ti bantuk in ngol cang uh tiah Tamu Security Group nih cun ralrinnak an pek hna.
