Kalaymyo, Tahan khua i mipi sermi ral kahcham Myanmar ralkap nih an kah lio ah a ttang ah an khenmi Chin tlangval Thang Hawm Lian (kum 26) cu a tuar hliamhma he a nunnak a liam. Nihin Tahan ah Chinmi pathum telh in minung 4 an nunnak a liam.
Tahan ah Chin Tlangval Meithal Kahnak in Nunnak Liam. Tahan ah ralkap meithal kahnak in Chin tlangval Sangte (kum 20) cu tu zanlei sml. 6:00 hrawng ah a nunnak a liam. Nihin Tahan ah Chinmi pahnih an nunnak a laim cang.
Tahan ah Lainu Pakhat Meithal Kahnak in Nunnak Liam. Nihin Tahan lamzawhtu pawl ralkap nih meithal in an kah hna i, Lainu pakhat a nunnak a liam. A nunnak a liammi Lainu hi Ah Khu (kum 37) tiah theihmi a si i, Women for Justice (WJ) timi bu ah hruaitu a si. Cun, Ah Khu hi India ram, Delhi ah caan saupi a rak um i, UNHCR ah holhlettu (Interpreter) caan saupi a ttuan.
Cu lawng si loin Burmese Refugee Women Delhi (BRWD) ah President zong a ttuan i, Delhi a um chung ah Chin le Burma ralzam dihlak ca ah dinh caan ngei loin rian a ttuan pengmi a si. A nunnak a liammi Ah Khu hi Thantlang peng, Leitak khuami a si, tiah kan theih.
Nihin Tahan Khuachung Ralram bang a Tur lio Khuami Cheukhat Sining. Tahan khuachung ralram bang in a tur lio ah khan khuami cheukhat thinphang in le zei tuah awk hngal loin innchung ah hitihin an um hna. Zaan sml. 7:00 hrawng ah meithal thawng a dai. Nihin Tahan ah minung pali an nunnak a liam i cu chung ah cun Chinmi pathum an i tel.
Tahan Kahcham Lak Ding in Myanmar Ralkap nih Bomb le Machine Gun Pawl an Hman. Mipi nih an sermi Tahan ral kahcham lak ding in Myanmar ralkap nih Bomb le Machine Gun pawl hmang in an doh hna, tiah Tahan khuasa Laimi sin in kan theih.
“Tahan khuchung cu ralram kan lo ko. Meithal kah thawng a dai lo. Machine Gun in pehzul in an kah hna. Atu tiang zong a dai lo. Chun ah khan bomb puah thawng voi 10 hrawng a thang cang,” tiah Tahan ah a ummi Laimi pakhat nih The Chin Journal ah a chim.
Tahan khuasa mi tampi nih, “Machine Gun lawng si loin RPG tiang in an hman,” tiah an chim. Atu tiang Tahan ah minung 7 hliamhma an pu i, kan Lainu Ah Khu a nunnak a liam.
The Chin Journal
