Uknak chut tu le mipi a kan that cuahmah tu Min Aung Hlaing le a ralhraang pawl hi hriamnaam cu an nei ttha ngai ko nain chunglei in an ralhraang pawl hi an lungput rawh tuk cang caah mipi nih kan doh cuahmahmi Spring Revolution hi a rauh hlaan ah teinak kan hmuh hrim hrim lai tiah Karen National Union Bridage 5 in bia chimnak nawl nei tu Padu Man Man nih a chim.
Ral tuknak lei in siseh ramkhel (politic) lei zong in tahchunh hna tik ah ramkhel lei ah hin National Unity Governmet cu ralhraang phu nak in a let tam pi in an i fit deuh ruangah caan zei maw zat rauh hnu ah cun ralhraang uknak cu a rawk hrim hrim ko lai.
Cun ralhraang lei zong in cheukhat cu mipi he hmunkhat ah ttang tti ding in mipi ttaang cung ah aa dormi an tampi cang bantuk in hi hnu zongah an rak i dor thluahmah rih lai, hriamnaam lei ah cun an nei ttha deuh nain lungput lei ah cun ralhraang pawl nih PDF ralkap pawl hi zei ti hmanh in an tei hna lo.
Revolution timi ah hin ral dohnak lawng in a rak za lo, a bik in mipi nih zei lei kap dah an dirpi timi hi a rak biapi tuk, NUG hi vawlei cung ram kip nih cohlaan an timh thluahmah cang bantuk in tu lio caan ah hin Federal Constitution pakhat a chuah khawhnak ding caah i zuam a hau ve tiah Padu Man Man nih cun a chim chap.
A luan ciami September ni 7, kum 2021 ah khan NUG nih Myanmar rampi cu Emergency caan chung ah a phuan cang i ralhraang dohnak caan thok a si cang tiah thawngthanhnak a tuah hnu khan cun pengkip ah ummi PDF hna le tlangcung hriamtlai phu hna fonh in nifatin bak in an doh cang hna.
