Yangon le Naypidaw motor lampi cung, meng 146 lonh, Taungngo khua luh lainak zawn chek gate ah nizan September ni 1, kum 2021 zan suimilam 10:00PM hrawng ah khan chek gate hngak tu ralhraang pakhat nih bia an i alnak ah an pu pakhat meithal in a kah hnu ah zaam in a luat tiah thawngpaang theih a si.
Hi kong he pehtlai in khuami pakhat nih “an chimnak ah cun a kut tang pa nih kahmi ralhraang bawi hi a kut zapei zawn ah meithal kuan nih khen, a thih cu thi lo, a kap tu ralhraang hi meithal he a zaam, a fiang bakmi thil pakhat cu an mah ralhraang chungah buainak a um cang timi hi si”
“Khoika Battalion in dah an si timi theih khawh si rih lo, pakhat le pakhat bia an i alnak ah a kut tang pa nih hin thinhun lung in a kahmi si, sii lei ralhraang le bomb puah tu ralhraang pawl an si ko hna” tiah a chim.
A tu bantuk in an pu kap tu le meithal he a zaammi pa cu ralhraang pawl nih an kawl chih nain tu tiang ah cun an hmu kho lo, pawngkam ummi khua chung zongah an kawl thluahmah ko nain tu tiang cu an hmu kho rih lo tiah thawngpaang theih chap a si.
