Tunai teah Hakha ah thil cangmi The Chin Journal nih a vun langhter mi hmuh cu lungfak taktak a si. Laimi Pa nih SAC Palik aa Hruaih Hna i Nawi ah Pu Ro Cung an Tlaih. Nihin zanlei sml. 5:00 hrawng ah Laimi pa pakhat nih SAC palik pawl Nawi ah a kalpi hna i Pu Ro Cung (Kum 65) an tlaih, tiah naihniam hna sin in thawng kan theih.
Pu Ro Cung hi Nawi ah Lo tuah in a riakmi a si. SAC palik a rak i hruaihtu Laimi pa (a min kan thei lo) pakhat nih Pu Ro Cung sin ah meithal ka pek, tiah SAC palik pawl a chimh hna. Upa pakhat nih, “Mah pa hi Pu Ro Cung zong nih a theihmi a si lo.
Kanmah zong nih kan theih balmi a si lo. Palik pawl a rak i hruaih hna i Pu Ro Cung sin ah meithal ka pekmi a um tiah a chimh hna. Cun, meithal kan pekmi chuah tiah Pu Ro Cung a hal,” tiah The Chin Journal ah a chim.
Palik nih Pu Ro Cung a riahnak thlaam cu an check i thilri an leh dih nain zei meithal hmanh an hmu lo. Asinain, Pu Ro Cung cu an tlaih i an kalpi. Nihin zaanlei ah Nawi ah Pu Ro Cung, Pa Tial Thawng Ling, Pu Tler Ling le a hawile pahnih tiin minung 5 an tlaih hna, tiah kan theih. Nihin Zaanlei ah Nawi ah Minung 5 an Tlaih Hna. Nihin zaanlei sml. 4:00 in 6:00 karlak hrawng ah Hakha, Nawi ah SAC palik nih minung 5 an tlaih chap hna, tiah thawng kan theih.
Tlaih a tongmi hna cu: Pu Ro Cung, Pa Tial Thawng Ling, Pu Tler Ling le a hawile pahnih an si.
Pa Tial Thawng Ling hi Timit ah Lo a riak i, zaanlei a tlunnak lampi Nawi ah an tlaih. Pu Ro Cung hi Nawi ah a riakmi a si i, a Lo ah an tlaih ve. Pu Thler Ling le a hawile pahnih zong hi Ngauthutlang (Nawi) ah an tlaih ve hna.
An zapi in palik motor chung ah an khumh hna i sakhaan lei ah an kalpi hna, tiah naihniam pakhat nih The Chin Journal ah a chim. Nihin zaanlei sml. 4:00 hrawng zong ah Khuathar CB Bank kiangkap ah a ummi Paletwa lei minung 2 tlaih an tong ve, tiah kan theih. Crd: The Chin Journal
