Karen National Union (KNU) nih an control nak hmun chungah ummi Blessing (ce-zun-daw) khua in ramhlak ah a zaammi khuami hna cu rak kir uh tiah ralhraang pawl nih an auh hna.
Nan rak kir duh lo le ramhlak i kan in hmuh hna ah cun thilak in kan in kah hna lai tiah an tlerh rih hna. Blessing timi khua hi Tanintharyi ramtthen, Dawei district, Yiphyo peng chung, Dawei in meng 33 tluk hlaatnak hmun ah ummi si.
Min Aung Hlaing ralhraang pawl nih CDM tuah tu pawl kawl kan duh hna tiah KNU lei in ttuanvo nei tu pawl he ceihmainak an neih hnu nizan August ni 27 chun ah khan khua chungah an rak lut, zahan zaan ah khan ralhraang cheukhat khua chungah an chiahtaak hna i cheukhat cu an kir tthan.
Khua chungah a rung taangmi ralhraang pawl nih khuami hna chung in ramhlak ah a zaammi hna cu rak tlung ding in an auh hna, nan rak kir lo ah cun ramhlak i kan in kawl hna tik ah kan in hmuh hna ah cun thilak kan in kah hna lai tiah an tlerh hna.
Ramhlak ah a zaammi khuami hna chung in minung 25 bak Covid-19 zawtnak an nei i naupawimi le hngakchia zong an i tel hna.
Khuami dihlak nawn in an zaam ruangah ei le din kong zongah an har ngai, zei ruangah dah KNU Bridage 4 nih ralhraang pawl hi khua chungah luhnak nawl an pek hna timi cu theih khawh si rih lo.
Zei bantuk kong in a si zongah an mah KNU nih an control khua bak si ko caah ralhraang pawl hi luhter hna ding bak an si lo.Hi kong he pehtlai in KNU Bridage 4 in ttuanvo nei tu Phadu Paluh Soe Win nih “CDM tuah tu hna kong he pehtlai in chikkhat te luh ta kan duh an ti ruangah kan luh ter hnami si, ramhlak tiang ah cun an kawl hna lai lo, kan mah zong nih kan zoh ko hna lai” tiah a chim.
Blessing timi khua hi hlaan lio ralkap uknak chan zong ah khan ralhraang le KNU kar kah dohnak ruangah an khua dihlak bak in aa tthialmi an si i a luan ciami kum 2012 hnu khan an rak kit tthan hnu ah an dirh tthanmi si.Cu ruangah khuami hna nih hin ralkap (tu ah ralhraang) an hmuh hna paoh ah ttihnak lungthin an nei cang, ralhraang pawl nih rak kir uh tiah zei tluk in an auh hna zong ah ho hmanh kir an i tim lo. Crd: All Chin Memento Union
