Chinmi kan ralkap a simi CNA caah USA & EU um, min langhter lomi Chin Mino bu nih kawlram phaisa in kyat 8 000 000,- (ting sawmriat) bawmhnak an pek. Kan ralkap thazaang a tthawnnak ding caah a lamkip in caan saupi tiang dirkamh ai timhmi mino bu pakhat an si.
Mah lawng hmanh si lo in ramdang Khuasa Hakha G-Z nih CNF/A ca ah Ting 30 MMK an Hlut rih fawn. Ram 3nk ah a phanmi Hakha Generation Z mino pawl nih CNF/A rianttuannak ca ah tangka ting 30 MMK an hlut, tiah Chinland Club nih an langhter.
Ram thum nak um mi long hmanh si lo in Mizo kan unau hna nih biatak tein Mizoram Phan Myanmar Ralzam hna ca ah Hlasaknak in fund an kawl piak hna i kawlram phaisa Ting 1,700 MMK Leng an Hmuh cang tiah theih a si.
Myanmar ram in Mizoram ah a zaammi ralzam hna ca ah tiin March 27 ah Benjamin Sum telh in Mizoram hlasa 15 nih chawkawl hlasaknak an tuah i, ting 1,700 MMK leng an hmu, tiah kan theih.
Myanmar ralzam hna ca ah chawkawlpiak hlasknak hi Mizoram ah a ngan bikmi LPS Studio le Zonet i bawm in tuahmi a si i, cu hlasaknak cu Zonet Youtube ah Live in an thlah.
Ram thumnak le Mizoram kan unau hna lawng hmanh si lo in Kan Unau Chinmi hna a Dihdongh Tiang in kan in Dirpi hna Lai,” tiah Delhi Phan Mizoram Hruaitu Pawl nih an Chim ve fawn.
March 23, zaan sml. 7:00-9:00 tiang, Delhi khuasa Chin ralzam hna le kan unau Mizo pawl fonh in Myanmar ralkap kut in a nunnak a liammi hna upat peknak le ralkap uknak duhlo langhternak cu Delhi khua i Mizoram House ah an tuah i, Mizoram hruaitu hna nih “Kan unau Chinmi hna a dihdongh tiang in kan in dirpi hna lai,” tiah an chim.
Nizan Program hi Mizo Zirlai Pawl (MZP) hruainak in tuahmi a si i, Meilul (candle) vannak, biatawi chimnak le thlacamnak in caan an hmang hna. Cu caanhmannak ah cun Mizo MP Pu K. Vanlalvena zong nih a telpi hna i, Chin le Mizo cu unau kan si, a dihdongh tiang kan i dirkamh hna lai, kan si khawhnak lam kip in kan cawlcang lai, tiah forhfialnak bia a chim.
Chin kan unau pawl kan dirpi hnanak, dirpi an herhnak kong cu Delhi Parliament Session ah ka chim. India Vice President sin zong ah ka chim. India Cozah lutlai hna sin ah pumpak in ka chim i Home Ministry tiang ah ka chim. Hmun tampi ah ka chim cang. Ka si khawhnak lam kip in ka chim peng rih lai.
Chin le Mizo cu British chan hlan hrim ah cun ramkhat kan si. Atu ah ramri nih kan dang hmanh sehlaw unau kan sinak cu an kan dang kho lo. Thisen in aa pehtlaimi kan sinak cu zeihmanh nih an kan tthen kho lai lo. Kan i dirkamh peng lai i, a dihdongh tiang kan ttuan ve lai,” tiah a chim.
MZP President Pu B Vanlaltana zong nih forhfialnak bia le Myanmar ralkap nih uknak an lak hnu in nihin tiang an cawlcanghnak le Chin mipi a lam kip in an dirkamhnak kong a langhter ve. Kannih MZP cu thih tiang in Chin kan unau kan dirkamh hna lai tiah timhtuahnak felfai tein a ngei cangmi kan si.
Mizo le Chin cu unau kan si bantuk in nan tonmi buainak cu kan buainak a si ve i nan harsatnak cu kan harsatnak a si ve. Chinmi kan unau hna ca ah thisen luan tiang in kan i ready. Tutan zong ah India Cozah sin ah fak piin bia chim kan timh lawng si loin Delhi hrambunh ram kip Embassy zong ah bia kan chim lai,” tiah a chim.
March 23 zaan ah tuahmi caanhmannak ah C. Lalremruata le NESO Council chungtel hna zong an rak i tel kho. India Central Cozah nih Myanmar ralzam luhter lo ding in nawl a chuah pengmi ruang ah Mizo Zirlai Pawl (MZP) chung in hruaitu lutlai a simi President, Secretary le an naule pahnih hna cu India Cozah ton ding in Delhi ah an rak phan. India cozah he ton ding in Delhi an rak phanh lio ah atu bantuk in Myanmar rammi hna (Abikin, Chinmi hna) dirkamhnak program an tuah hi a si.
