Ralkap council nih rampi zuarthlai sualpuhnak pohmah 122 in taza an cuaimi kongah Dr. Sasa nih cun kaa lungsi tuk tiah lehrulhnak bia a chim cang.
Dr. Sasa nih cun “Ralkap nih rampi zuarthlai sualpuhnak in taza an ka cuai ruangah ka lungsi tuk ti kha chim ka duh. Firkhu ralkap caah zumhtlaklo ti a sullam cu Myanmar mipi leiah ka dir i rammi hna zalennak, federal democracy le tlukruannak caah ka nunnak ka pek tinak a si.
Thihdan pek khawhmi hi sualpuhnak nih tihnak a ka ngeihter kho lo. Myanmar ram pumpi in lamcung ah chuak in lam a zawhmi miraltha hna khi kham khawh an si lo bantukin keimah kham khawh ka si ve lo“ tiah a chim.
Dr. Sasa cu CRPH nih Feb 22 ah UN ah Sepecial Envoy in a thlahmi a si. Ralkap council nih March 15 ah taza an cuai i tlaih dingin an thanh. Cucu March 16, zan 8:00pm ah MWD TV nih a thanh.
Kan theih cio bantukin Dr. Sasa cu vawleicung ram hruaitu, upadi thiamsang, cohrin covo bu hruaitu le Myanmar ram chung tlangcung hriamtlaibu hruaitu hna he an i tong, bia an i ruah i ralkap uknak thlak dingin aa zuam lengmang.
“Rampi zuarthlai sualpuhnak in taza an ka cuaimi hi zoh tikah phungning a si lomi ralkap nih an ka control kho ti lo, an ka tei kho ti lo ti kha an theih cang caah uite ekchuak bang an i tengtele cang ti a lang” tiah Dr. Sasa nih cun a chim.
