Tutan hi a luancia thil bantuk a si mi 2008 phunghram lei ah van kir ta ko ning. a ruang cu ralkap doh le phunghram hrawh nak ding ah cun 2008 phunghram hi van bih than a herhnak a um tawn a ruang cu mipi kan caah a thi cang ko nain ralkap nihcun Asian ram le nitlak lei ram hna ahcun 2008 phunghrma cherhchan in rian a tuan rih caah hi phunghram hi lanh tak thlu awk tha rih lo.
Tutan ah 2008 phunghram kong deuh hi ka langhter lai nain a Dal le a caang kha ka langhter in ka fianter lai lo. zapi kan hngalh dih ngawt mi a si cang pin ah caan tampi le catlaang tamtuk tial a hauh lai caah a tawifiannak in langhter tu ka zuam lai.
Phunghram hi a hramthawk in a donghtiang kan zoh tik ah, mipi nak in mibu pakhat caah nawlngeihnak asang deuh mi a si. Mipi dirkamh lo in mibu pakhat dirkamh tu ca men ah ser mi a si. ram mipi nak in pawngkam ram Asia ram hna nih covo an ngei deuh.Afawinak cun kan ram thilchuak mi in ramdang nih sal ah aa kan zuat.
Kawlram chung ah phunghram sertu hna cu phunghram cung ah an um, phunghram ngeitu bantuk in an um. cu phunghram nih thildik dirpi loin thildik lo kha a dirkamh peng. cu ruang ah 2008 phugnhram ning ruang ah ramdang le Asian hna nih 2008 phugnhram buar in kawl ram caah rian antuan kho lo.
Cucaah ralkap hi hrawh hlan deuh ah official taktak in 2008 phunghram kan hrawh cang ti kha thanh bak a hau. Nai ah CRPH nih a hrawh ko cang nain ahram athi thlu lo cu mu. Ralkap kan tuk hnu le tei hnu ah Phunghram hi nung than kho mi a si. a ruang cu raltuk a dih hnu ah ramkheel mit in riantuan a sicang lai caah kawl ram mi tampi cu ralkap kan hrawh ah a za, phunghram tucu duhsah in i caih hnu ah a herh mi poh remh siseh timi politics kha ramchung ramleeng in a luut kho mi a si.
Ralkap doh a dih hnu ah mi tampi thisa a dai lai i phunghram hrawhnak kong ah lamcaan a sau kho mi a si. Nihin i ralkap a doh taktak mi hnachung zong in phunghram pi tiang va buai cu za cang ko seh, hihi cu duhsah deuh in kan caih hna lai ti in lam caan a sau kho. zei catiah ralkap a dirkamh lo nain phunghram a dirkamh mi ramkheel minung le party an tamtuk rih.
Phunghram kong ah a dang tein buai pi ding a si ahcun ramchung politics buainak deuh a si cang lai caah ramdang palai le UN zong nih aa thlangtlak ngam tuk ti lai lo. Nihin kan buainak a ruang bik hi a hram pi cu phunghram ruang ah a si.
UN le Asian ram hna zong nih, Ralkap nan hrahw ko cangi phughram cu ramchung politics he a apehtlai mi a si caah nanmah i chawn bia ko cang uh tiin an dai te ko lai. 2008 phunghram athat lo tik ah thil dik ning tein ramchung buainak daihter khawh a si lo. a phunghram pi hrim hi a buai i aa tawn tuk mi phunghram a si caah buainak kha daihter kho tawn lo.
Cucaah Phunghram hi tuan ah hrawh hmasa a herh. Phunghram kan thah khawh hnu ah ralkap kan hrawh ahcun a buai ding mi a um ti lo. Ralkap lawng hrawh i phunghram hrawh lo sual ahcun milu tamdeuh kut in luat a har kho mi a si. Phunghram ruang ah ramchung ramkheel party hi a dik mi ramkheel party an chuak kho lo.
Zeicatiah ramkheel party vialte 2008 phunghram tang ah dirh an si. cu tik ah an covo a tlawm tuk caah zer tian in teinak kha kawl cio a si. cu tik ah ramkheel Party tampi an dir ko nain an dirhnawh chan kha ram ca le a dik mi democracy ca siti lo in bukhat hlawknak ca tuak lawng in i zuam cawh atam. Chim duh bik mi cu, Ralkap hlan ah 2008 phunghram hi vawlei pi thei in hrawh a hau.
Zei ram hmanh nih hi 2008 zulh in kawl ram kong i thlak kho hna hlah seh, raltuk a dih hnu ah hi phunghram cherhchan in UN cheu khat, Asian ram upa hna nih kan ram chung buainak kha aa tlangtlak nak ah an hman sual lai caah hi 2008 phunghram hi a hram in bongh hamsa hrimhrim a herh. cu hnuah ralkap hi hrawh ah a tha. Hi cabia hi catial tu pumnpak keimah ka hmuh ning a si. ka peh than te lai.
