Pu Tler Ling Upat Peknak le Lamzawhnak an Ngei. May 11 ah Hakha SAC ralkap/palik kut in a nunnak a liammi Pu Tler Ling upat peknak cu nihin May 12 ah Cherry lam i Pu Tler Ling tein ah Hakha mino nih an tuah i Pu Tler Ling a thihmi kong ah dinfelnnak hmuh a herh zia le phuhlam ding in rian kan ngei tiin lam cung chuak in lamzawhnak an tuah hna.
Nihin thawngpang a linsa ngai mi cu a tanglei bantuk hin The Chin Juornal nih a vun langhter. Tamu Mipi Ralkap (TPDF) le SAC Ralkap Kahdohnak ah SAC lei Minung 15 an Thi tiah fiang ko in a langhter. Nizaan May 11, zaan 10:00 in 12:00 tiang Tamu peng, Panthar khuate ah mipi ralkap Tamu PDF (TPDF) le SAC ralkap karlak kahdohnak a chuak i SAC ralkap lei in minung 5 an thi i, TPDF lei in minung pakhat a nunnak a liam ve.
Nihin May 12 zinglei sml. 4:00 zong ah Tamu peng, Kunttaung palik sakhaan cu TPDF nih an vung kah i SAC lei in a tlawm bik minung 10 an thi. A thimi 10 lak ah hin SAC ralkap a bawmtu Kathe tapung (Manipur Meitei) minung 4 zong an i tel, tiah Tamu Security Group (TSG) nih thawngpang an chuah.
Relchap-Hniarlawnthar Pu Cung Bik Inn Nizaan ah Bomb Puah a Tong Ve. Nizaan zaanttim sml. 12:00 hrawng ah Hniarlawnthar Pu Cung Bik inn bomb puah a tong, tiah kan theih. Bomb puahnak ah an inn kii khatlei aa hawk viar. Hliamhma a putmi belte an um lo. Nizaan ah Hakha khuachung ah hmun 2 le Hniarlawng ah hmun 1 tiin bomb an puak hna.
Hakha ah cun Hniarlawnthar Pu Cung Bik inn ah le Khuahlun Na Ta La sianginn pialnak pawng ah a ummi Kawlmi (Pepeuh/ပဲပြုပ် azuarmi) hna innhmai ah a si. Khuahlun Kawlmi innhmai bomb puahnak ah a rawkralmi a um lo. Aa hliammi zong an um lo.
Hniarlawn khua ah USDP chungtel a simi Pu Phir Maung te inn ah bomb a puak ve i, Pu Phir Maung hliamhma a tuar (a fak lo). Nizan ah Paliklen lei zong in meithal puah thawng pawl a thang len, tiah Dawrhlun khuasa hna nih The Chin Journal ah an chim.
The Chin Journal
