Ralhrangbu Kantayar Sii-inn Riantuan 35 Sin In Covid-19 Zawtnak An Hmuh Yangon Inya kan pawngah a ummi ralhrangbu sii-inn riantuan 35 sin in covid-19 zawtnak an hmuh tiin riantuan tu hna sin in theih a si.
Kantayar sii-inn ah riantuantu 200 hrawng an um.Zawtnak hi nurse,tangka tlai tu le khual chawn tu, emergency riantuantu le sii dawr riantuantu hna sin in hmuh a si. Zawtnak a zual deuh mi lawng zohkhenh an si i,cheukhat zawtnak a lang tuk lo mi hna cu riantuan an ngol ter hlei hna lo.
Covid-19 checknak zong tha tein tuah pi asi lo tiah riantuantu hna nih an chim. Atu ah covid-19 zawtnak in sii-inn ah zohkhenh lio mi 20 leng an um.Ni fatin a lengin a rak i zohter mi minung 70 hrawng an um peng.Atu dirhmun zoh ah khar ding a si cang tiah cheukhat nih an ti.
Kantayar sii-inn ah ralhrangbu nih a ngeih mi Myanmar Economic Corporation- MEC nih a ngei mi a si. 2017 December 26 ah ralhrangbu nih an hon mi a si i,ralhrangbu chungtel 381,636 nih share an ngei mi asi tiah theih a si.
Ralhrangbu nih uknak a lak hnuah sii-inn hi bomb an puah lai an phan caah Nurse le sii-inn riantuan hna zong mi hngah/bawh rian an tuan ter peng hna tiah Mizzima News nih a tial.
Relchap- Mungku Ah Ralhrang Le MNDAA An I Kap. Shan ramkulh thlanglei Muse peng,Mungku khuapi pawng Mansai khua le Namhai khua karah ralhrang le MNDAA cu July 21 zinglei suimilam 11 ah an i kap.
Namhai khua ah ralhrang nih Khah-Mah-Yiah 315 le Khah-Lah-Yiah 29 fonhin umhmun an khuar caah MNDAAA nih an kahnak hna hi a si.
July 20 zan suimilam 9 hrawngah Kawngvuan khua pawng ah ralhrang rallokap mawtaw in thilri le minung thazaang chap in a phurmi cu MNDAA nih an kah hna i ralhrang lei in hliammi an tam tiah theih a si. Crd: TCP
