Sagaing ramtthen, Tanhse peng, Leikchan timi khua in chaklei kap zawn Che Chaung timi hmun ah nizan September ni 19, kum 2021 zanlei suimilam 6:00PM hrawng ah khan Kar Paung khua thil cangmi kong he pehtlai in chungkhat pakhat hna cu dalan nan si tiah an rak kah hna, dalan chungkhar pawl zong nih cun an kah ve hna i kaphnih kar ah kahnak a chuak.
Hi kahnak ah dalan chungkhar lei in minung pa 5 bak an thi, thah a tongmi hna cu U San Win i a chungkhar hna an si i pa pa 4 le nu pakhat an si, thah a tongmi dalan chungkhar hna lak ah kum no bik hi kum 20 hrawng a si. A luan ciami August thla ah khan ralhraang pawl nih Kar Paung timi khua hi rak luh hnawh in an kah hna ruangah khuami zei maw zat an rak thi.
Tutan dalan chungkhar hna thah an tonnak kong he pehtlai in khuami pakhat nih “thah a tongmi hna hi Kar Paung khua dalan Ngun Khin i kut tang rianttuanmi pawl an si, ralhraang sin ah thawng pe tu dalan ngan bak an si, Kar Paung khua ah cun Ngunt Khin tiin Tanhse peng chung tiang ah minthang mi dalan si”
“Khat lei ah piosawtthi chungtel zong a si fawn, Min Aung Hlaing ralhraang pawl nih Kar Paung khua an rak luh hnawh lio le khuami an rak thah hnanak zongah hi hna ruangah tampi aa tel, cu ruangah an thah hnanak si ko” tiah a chim.
Sagaing ramtthen, Tanhse peng chung ah dalan an tam khawh ning hi lungrawk bak si, tu ni caan tiang ah thah tongmi dalan zong hi an tlawm ti lo nain a dih hrim an dih kho lo, a luan ciami September ni 17 zongah khan dalan nuva meithal in an rak kah hna.
