Ralhraang Pawl A Rannak In Dantat Ding In U Kyaw Moe Htun Nih UN General Secretary Sin Ah Ca Kuat

Kan theih cio bantuk in a voi 76 nak United Nationas General Assembly tuahnak ah NLD cozah chan ah UN Special Envoy a rak ttuanmi le ralhraang nih uknak an laak hnu ah ralhraang lei ah ttang loin NUG lei ah a ttangmi U Kyaw Moe Htun cu bia chimnak nawl an pe lo nain a mah pumpaak in UN General Secretary sin ah ca a kuat.

Myanmar ram chungah Min Aung Hlaing le a ralhraang pawl nih thahnawnnak an tuah peng rih caah ramdang lei nih hin Myanmar ram kong he pehtlai in tuah colh dingmi le hmual a nei ngaimi thil hi a rannak in nan tuah colh a hau tiah UN Special Envoy a si rihmi U Kyaw Moe Htun nih cun UN General Secretary simi Antonio Guterres sin ah ca a kuat.

Mah ca hi a luan ciami September ni 17, kum 2021 ni le thla khenh in a rak kuatmi si i ramdang lei nih hin Min Aung Hlaing le a ralhraang pawl hnon ding le Myanmar ram hi Democracy lam cung a phanh hlaan lo, ralhraang sin ah zei bantuk bawmhnak hmanh pe lo ding in a halnak zong aa ttial chih.

Min Aung Hlaing te phu nih hin Myanmar ram chungah uknak an laak hnu in ni 220 fai ah sualnak nei lo minung 1000 leng an thah cang hna bantuk in minung tampi an tlaih, an hrem hna hlei ah thong an thlaak rih hna. A luan ciami September ni 9, kum 2021 ah Magwe ramtthen, Min Tar khua ah ralhraang pawl nih khuami 18 an thah hna i September ni 10 zong ah Hnamkha timi khua ah inn 36 an khanghnak vialte zong a langhter dih.

 

Total Page Visits: 607 - Today Page Visits: 3

Leave a Reply

Your email address will not be published. Required fields are marked *