Sagaing ramtthen, Kalay district, Minkin peng, Taung Dwin Chaung pawngkam, Gone Maw timi khua nitlaak lei ramhlak tiva chungah USDP ttanh tu minung pathum ruak an char hna, Min Aung Hlaing ralhraang pawl nih nizan September ni 21, kum 2021 ah khan an rak chek hna. Thah a tongmi hna hi Minkin peng, Sat Lin Chaung khuami hna an si i USDP ttanh tu le dirpi tu lo thlo pawl an si, an min hna cu Ko Si Thu (kum 32), Ko Ee Wai (kum 26) le Ko Soe (kum 25) hna an si, an hngawh zawn ah naam in an ah hnanak in an thi, an thih hnu ah an ruak cu tiva chungah an hlonh hna i tiva nih a rak fenh hnanak in an hmuh hnami si tiah khuami pakhat nih a chim. Cun thah tongmi hna he aa neihniam ngaimi pakhat nih “tu thla ni 10 ah khan kan mah khuami si lomi minung 100 leng nih an tlaih hna hnu ah an i kalpi hna, ni zei maw zat chung rauh hnu ah tu bantuk in tiva chungah an ruak in hmuh an si, mi zei nih dah, zei ruangah dah an thah hna timi cu theih khawh si rih lo. Hi minung pathum an rak tlaih hna ni ah hin Minkin, Taung Dwin Chaung peng Ma-O timi khua chung inn pa 7 bak a rak kaang, mah ti inn kaanmi ruangah kum 27 simi pa, pakhat a rak thi.
Enter
Total Page Visits: 328 - Today Page Visits: 1
