Sagaing ramtthen, Monywa khua Myawaddy sang, Kyoke Kar lam cungah ummi Mytel zung hngak tu Min Aung Hlaing palik pakhat cu tuni September ni 23, kum 2021 zanlei suimilam 4:00PM hrawng ah khan MPDF nih meithal in thilak kan kah hnu ah a meithal zong kan laak tiah MPDF sin in thawngpaang theih a si.
Hi kong he pehtlai in khuami pakhat nih “meithal in an kahmi ralhraang palik pa cu an kahnak hmun bak ah a thi colh, tu cu ralhraang pawl an motor he an vun phan i an buai lulh ko, sanguk bawi zung hmai zongah ralhraang pawl cu motor he an khat tthup ko” tiah a chim.
Monywa khua chungah Mytel zung an chiahnak pawl hi Myawaddy ralhraang palik sakhan pawng ah si i a luan ciami September ni 15 zong ah khan tutan ralhraang pa thilak an kahnak zung hmai ah bomb in an rak cheh bal ruangah zung hmai lei zawn a rak rawk cang.
A tu bantuk in ralhraang palik pakhat thilak in kah a tonnak kong he pehtlai in Moywa khua, Myawaddy palik sakhan ah DVB nih pehtlaihnak tuah ding in phone an chawnh chih hna nain phone call an la duh lo.
