Chin ramkulh Mindat khua EPC zung hngak tu Min Aung Hlaing ralhraang hna chung in ralkap pa 2 hna cu nizan September ni 17, kum 2021 zan ah khan an zaam hnu ah CDM tuah in tu hi Mindat CDF hna sin ah an i dor tiah thawngpaang ttha theih a si.
A tu bantuk in a zaammi ralkap pahnih hna hi Min Aung Hlaing ralhraang, Bridage 55 tang, khah-mah-yah 94 in an si, an pahnih tein Mindat CDF nih an cohlaan hna tiah CDF-Mindat lei in ttuanvo nei tu pakhat nih a mah facebook cung in a thlah, hriamnaam an i zaampi chih le zaam pi chih lo kong belte an ttial chih lo.
Chinland Defense Force (Mindat) lei nih an cohlaan hna hnu ah a herhmi chekhlatnak an tuah hna i mipi lei nih thinphannak nei lo ding in CDF lei in ttuanvo nei tu nih cun a chim chap, Min Aung Hlaing chuahtaak le zaamtaak in mipi lei ah a ttangmi ralhraang hna cu lunglawm tein kan cohlaan hna lai, hriamnaam aa zaampi khomi cu Kyat ting 50 kan pek hna lai tiah thawngthanhnak an rak tuah.
CDF sin ah a rak zaammi ralkap cheukhat a zaammi an um tthan timi thawngpaang a hung chuah ruangah a tu bantuk in ralhraang zaammi hna le CDF le PDF sin ah aa dormi hna kongah mipi lei in thinphannak tete a um caah mipi lei in thinphannak nei lo ding in CDF lei nih an chimnak hi si.
