Magwe ramtthen, Gangaw peng chung ummi ralhraang hriamnaam chuahnak sehzung ah rianttuanmi ralhraang pawl nupi le pa 2 an i siknak ah zei hmanh sualnak nei lo kum 12 nute tu naam in an sawhnak in a nunnak liam tiah khuami hna nih an chim.
A luan ciami September ni 24, kum 2021 chung ah khan Magwe ramtthem, Gangaw peng, Kyaw timi khua in chaklei ah ummi kah-pah-sah 23 ah phaisa tlaunak kong he pehtlai in ralhraang nupi pa 2 bia an i al, mah ti bia an i alnak ah a nu zul tu ralhraang nupi fanu kum 12 simi nute cu naam in an sawh.
Hi kong he pehtlai in thil sining dik tak in a hmu tu le thei tu pakhat nih “hi ralhraang nupi nu hi mi phaisa fir hmangmi si, a hlaan tein phaisa fir a hmang peng, an inn pawng ummi ralhraang nupi pakhat he bia an i al, ka phaisa na fir tiah an inn pa nu nih hin a va sawhchih, mah ti a va kal hnawhnak ah a mah he kal vemi a fanu te cu phaisa fir hmangmi ralhraang nupi nu nih naam in voi 5 bak a sawh” tiah a chim.
Naam sawh tongmi kum 12 nute cu sizung ah an tlik pi ko nain lampi ah a nunnak liam, ralhraang pawl lawng si loin an nupi le hna zong an vansang tuk cang, phaisa tlawmpaal ruang ah an fa le tiang an i thah piak, hi tluk in an buai lio ah an pasal le cu zei thei loin an pu khuachia pa Min Aung Hlaing caah ral dohnak hmun ah an thi thluahmah ve.
